Gerookte-eiervrugpatee
Genoeg vir 4 Bereidingtyd 5 minute
Gaarmaaktyd 45 minute
’n Heel gebraaide of oondgebakte eiervrug het klaar ’n unieke rokerige geur. As jy dit boonop rook, raak dit ’n hemelse affêre.
Jy benodig
• 2 eiervrugte
• sap van 1 suurlemoen
• 2 knoffelhuisies, fyngedruk
• ¼ koppie (60 ml) olyfolie
• ½ koppie (125 ml) jogurt
Só maak jy
Berei die roker voor. Sny die eiervrug in die lengte middeldeur, sit dit met die gesnyde kant op die rookrakkie en rook dit vir 30 minute.
Krap die sagte vleis uit die eiervrug en druk dit fyn saam met die suurlemoensap, knoffel, olyfolie en jogurt. Geur dit na smaak met sout en varsgemaalde swartpeper. Sit die patee dadelik voor met soutbeskuitjies of brood, gerookte fetakaas en gerookterissiesous (resep hieronder) as ’n voorgereg.
WENK Die heel eiervrugte kan ook net so in die skil met krummels feta, gerookterissiesous (resep hieronder), olyfolie en jogurt voorgesit word as ’n vegetariese hoofmaal. Ander groente, byvoorbeeld heel blomkool of aartappels, kan op dieselfde manier gerook word – pas net die tyd aan volgens die soort groente.