Hoenderlewer-en-sampioenpatee
Genoeg vir 6 Bereidingstyd 20 minute plus 2 uur afkoeltyd Gaarmaaktyd 10-15 minute
Jy benodig
• 100 g botter • 100 g portobellosampioene
in skyfies gesny • 250 g hoenderlewers • 2 sprietuie, fyngekap • 100 g amandels, fyngekap • 1 teelepel (5 ml) droë tiemie • 1 teelepel (5 ml) fyn kaneel • 1 teelepel (5 ml) paprika • 2 eetlepels (30 ml) dessertwyn
(ons het edellaatoes gebruik) • 120 ml vars room • 1 takkie vars roosmaryn • geroosterde rogbrood
om voor te sit • lemoenkonfyt om voor te sit (resep hieronder – jy kan ook appelliefiekonfyt gebruik) • nastergalkonfyt om voor te sit
(of gebruik enige bessiekonfyt)
Só maak jy
Smelt 70 g van die botter en braai die sampioene tot goudbruin. Voeg die hoenderlewer en sprietuie by en braai dit tot net-net gaar. Voeg die amandels by (maar hou ’n eetlepel vol vir garnering), plus die tiemie, kaneel en paprika, en braai dit vir nog 2 minute. Gooi die dessertwyn in die pan en kook dit om die bruin deeltjies los te kry. Voeg die room by, verhit die mengsel tot kookpunt en laat dit vir 5 minute afkoel.
Verpulp die mengsel in ’n voedselverwerker, maar nie te fyn nie – dit moet die tekstuur van hummus hê. Verdeel dit tussen 6 ramekinbakkies.
Smelt die res van die botter, skep ’n bietjie oor elke bakkie patee, en sprinkel die res van die amandels – gekap – plus ’n knippie tiemie en vars roosmaryn oor. Laat dit vir 2 uur in die yskas afkoel. Sit die patee voor met geroosterde rogbrood en lemoen- en nastergalkonfyt.