Koningskaas
Dalewood Fromage se Huguenot-kaas – ’n neuterige neef van gruyère wat 6 maande verouder is – is vanjaar by die SA Suiwelkampioenskappe as die suiwelproduk van die jaar aangewys, maar toe vertel Celeste Scholtz, ons voorbladmodel in die vorige uitgawe, jy kry dit ook in ’n kleiner “Truckle”-grootte (gemiddeld 1,2 kg elk) wat jy, net soos ’n Switserse tête de moine-kaas (’n sogenaamde monnikskop), in veerligte “kaasangeliere” kan verander met ’n kaassnyer wat die Franse ’n girolle, die Hollanders ’n kaaskruller ( Nee, hy maak nié daai goedkoop spookdrolle wat jy by die keffiekoop nie. – Reds.) en die Engelse ’n cheese scraper noem. ’n Partytjietruuk duisend! • Dalewood se winkel langs die R45 (die Simondiumpad) verkoop kaas en kaasbykomstighede en is Maandae tot Vrydae van 09:00 tot 16:00 oop. Tussen September en Junie doen die winkel ook Saterdae van 10:00-15:00 sake.