Perske-en-rissie-garnaalrolletjies

Genoeg vir 6 Bereidingstyd 10 minute Gaarmaaktyd 10 minute

Vul sagte broodrolletjies met gebraaide garnale, lemmetjiemayonnaise en koolslaai vir ’n voorgereg wat mense sommer so van die kole af kan eet. Jy kan al die werk vir die rolletjies vooraf doen en alles gereed hou.

Jy benodig

• 1 groot perske • 1-2 eetlepels (15-30 ml) rissiesous • 1 eetlepel (15 ml) olyfolie • 500 g garnale, skoongemaak en dermpie en doppe verwyder • 2 koppies (500 ml) kool, fyngekap • ’n bossie koljanderblare, fyngekap • ’n hand vol mentblare • 4 stingeluie, gekap • 6 hamburgerrolletjies

VIR DIE LEMMETJIEMAYONNAISE • 2 eiergele • sap en gerasperde skil van 1 lemmetjie • 2 knoffelhuisies, fyngedruk • ½ teelepel (2,5 ml) sout • 2 koppies (500 ml) avokado-olie

(druiwepitolie werk ewe goed)

Só maak jy

Verpulp die ryp perske, rissiesous en olyfolie in ’n voedselverwerker. Verf die garnale met die perskemengsel, ryg dit op stokkies wat ’n paar uur in water geweek het, en braai dit dan vir 2 minute aan ’n kant oor matige kole tot die garnale ’n pienk kleur kry. Smeer nog van die perskesous aan net voordat jy dit afhaal.

Maak die lemmetjiemayonnaisse

Meng die eiergele, lemmetjiesap en -skil, knoffel en sout in die beker van ’n versapper. Gooi die olie druppel vir druppel by terwyl die masjien loop en pols tot die mayonnaise dik is. Proe en voeg nog lemmetjiesap en sout na smaak by.

Meng die kool, koljander- en mentblare, stingeluie en die mayonnaise en skep ’n paar eetlepels op elke broodrolletjie.

Druk die garnale van die stokkies af en sit ’n paar garnale in elke rolletjie. Sit dit dadelik voor.