Basilieroomys

Maak 1ℓ Bereidingstyd 30 minute plus afkoeltyd

Omdat dié roomys met jogurt gemaak word, is dit heerlik lig. Die metode is geskoei op ’n resep van Max Falkowitz.

Jy benodig

• 1 groot bossie soet basilieblaartjies • ½ koppie (125 ml) suiker • ½ teelepel (2,5 ml) gerasperde

lemmetjieskil • sap van 1 lemmetjie • 2 koppies (500 ml) volroomjogurt • ’n knippie kosjersout

Só maak jy

Pols die basilieblaartjies en suiker in ’n voedselverwerker of versapper tot dit goed gemeng is. Roer die mengsel saam met die lemmetjieskil en -sap asook die sout by die jogurt in totdat die suiker heeltemal opgelos het. Sit die mengsel vir 1 uur in die yskas tot dit yskoud is.

Skep die mengsel in ’n roomysmaker en laat dit draai tot die roomys dik word. Vries dit dan verder in die vrieskas (ongeveer 3 uur).