DIE TUIN AS ENSIKLOPEDIE
‘E k boer die afgelope 44 jaar al op Verrekyker, ons familie se peerplaas buite Wolseley in die Breëriviervallei, en net so lank al maak ek tuin. Dis my ma wat my lief gemaak het vir plante – ook my oupa was mal oor tuinmaak.
“Winter is ’n wonderlike seisoen in ons tuin: Die Japanse ahorn spog vir oulaas met sy besonderse oranje, geel en rooi blare, en vroeg in Junie begin die meer as 40 aalwynspesies wat ons oor die jare geplant het, die tuin opvrolik. Ons eet ook te lekker aan ons eie avokado’s.
“Nes dit voel of die winter te lank raak, begin die clivias blom wat ek al 20 jaar versamel en waarvan daar duisende is. Dit is nie van die duurste of ghrênd soort nie, maar hulle kom van oraloor – Pietermaritzburg, Pretoria en George. In dié tyd kleur die peerboom bloeisels die wêreld spierwit.
“Ek koop graag interessante plante, en dan besluit my vrou, Elizabeth, waar in die tuin ons dit gaan plant. Só het ons al vir meer as 15 soorte broodbome, 4 soorte kraanvoëlblomme, pragtige Natalse boskiepersolle, swartbamboes en ginkgo biloba plek gemaak in ons tuin. Ek gaan ook elke jaar na die verkoping van skaars plante op Stellenbosch – dis ’n fees vir plantliefhebbers.
“My skoondogter Suné is lief vir kosmaak en daarom het ons nou ’n groentetuin met beet, wortels, ertjies, spinasie, radyse, artisjokke en bloubessies vir die snaaksigheid.
“Ek het ’n sagte plek vir bome en het reeds meer as 160 verskillende spesies geplant, waaronder mango, lietsjie, macadamiaen koejawelbome. Ons tuin is 2 ha groot, maar dit het te klein geraak vir alles wat ek wou plant. Nou het ek begin om bome in die berg agter ons huis te plant. Ek hou van inheemse en uitheemse bome, maar aan die voet van die berg plant ek net inheems – van witels, rooiels, sybas, assegaaihout en Natalse ghwarrie tot witpeer, wildeperske, witstinkhout en ’n vaderlandswilg. En natuurlik al die geelhoute –hen k else geelhout, die breërivier geelhout en die ou ten i qua geelhout.
“My tweejarige kleinseun, Andreas, ken al ’n klomp voëls en ek begin nou vir hom boomname leer. As jy vandag ’n boom plant en môre sterf, kan geslagte ná jou nog die boom geniet. Boonop is elke boom werklik uniek.” Fanie Redelinghuys, Wolseley >