Groot bome vir Afrika!
By Trees SA se grootboomkwekery tussen Stellenbosch en Somerset-wes wag meer as honderd verskillende boomspesies – die een so onweerstaanbaar soos die ander, en party sowaar 15 m hoog!
‘Ons hou meer as 100 verskillende spesies bome aan,” vertel Dag Willems, die eienaar. “En nie net die gewilde spesies nie – daarvoor is ek eenvoudig te lief vir bome. Ek kan nou maar eenmaal nie ’n mooi boom weerstaan nie.”
Dag het tot in 1999 as streekbestuurder: inheemse woude by die Weskaapse departement van bosbou gewerk en toe die gedagte gekry om sy eie boomonderneming te begin. In 2004 het hy besluit om nét op die kweek, “redding” en verskuiwing van groot bome te fokus.
“In daardie stadium was daar nog nie so ’n professionele diens in Suidafrika nie. Daar was wel ’n paar cowboys wat bome verskuif het, maar die manier waarop hulle dit gedoen het, het die besigheid ’n slegte naam gegee. Dit het tyd geneem om dié beeld te herstel.”
In 2003 het Dag kwekerye in Europa besoek om idees te kry, en ná sy terugkeer die eerste bome in groot suikersakke geplant. Hy moes ook inspring om baie van die boomskuiftoerusting self te ontwerp en te laat maak. ’n Bietjie meer as 12 jaar later het Trees SA vyf kwekerye met ongeveer 60 000 groot bome in voorraad.
Die kleinste bome wat jy by Trees SA kan koop, kom in 250 ℓsakke. Dit neem vyf sterk mans om sulke bome met die hand te verskuif. Vir die ander groottes
(tot en met die 4 500 ℓ-sakke) is spesiale toerusting nodig. “Ons het ’n 95%suksessyfer as dit by verplanting kom – sukses beteken nie die verplante boom moet ’n paar groen blare hê nie. Vir my is sukses ’n boom met ’n volkroon wat onafhanklik kan funksioneer.”
Dag skryf hulle sukses toe aan die feit dat Trees SA sy eie toerusting, hyskraanlorries, installasiespan en nasorgdiens het. “Vir ons span lê die bevrediging in die installasie van die boom. Iemand ry nie net hier uit met ’n boom agterop sy bakkie en ons sien hom nooit weer nie. Min dinge is so lekker as om te sien hoe ’n groot boom ’n doodgewone tuin in ’n karaktervolle tuiste omskep.”
‘ ’ n Mens stap nie sommer een- twee- drie deur die Trees SA se grootboomkwekery en kies in ’ n japtrap vir jou ’ n boom nie. Hier is rye en rye en rye tamaai bome, die een so besonders soos die ander, met ’ n eiesoortige kroon of blaar of bas.’