Witlofsop met oop kaasbroodjies

Hierdie grootmenssop is wintertrooskos op sy beste, maar ook indrukwekkend genoeg om vir gaste voor te sit. As jy wil, kan jy dit verder opkikker met van jou gunstelingkaas en ham of spek.

Genoeg vir 6 Bereidingstyd 20 minute Gaarmaaktyd 30 minute

Jy benodig

VIR DIE SOP • 30 g botter • 4 salotte, gekap • 30 g meel • 2 koppies (500 ml) hoenderaftreksel • 3 witlofkoppe • 1 klein blomkoolkop • 2 knoffelhuisies, fyngedruk • 300 ml melk • 100 g emmentalerkaas, gerasper

VIR DIE OOP KAASBROODJIES • botter • 6 snye suurdeegbrood

(of meer, indien verkies) • heelkorrelmosterd • emmentalerkaas • vars origanumblaartjies

Só maak jy

Verhit die roosterelement van die oond. Smelt die botter in ’n kastrol en roerbraai dan die salotte stadig tot dit sag en gekaramelliseer is. Sprinkel die meel oor en roerbraai dit vir ’n minuut. Begin dan die aftreksel bietjies-bietjies byvoeg en roer tot dit begin verdik. Kap die witlof en blomkool in stukkies en voeg dit saam met die knoffel by die kastrol. Laat dit prut tot die blomkool sag is – dit sal omtrent 15 minute neem.

Maak intussen die kaasbroodjies Smeer ’n dik laag botter op die broodsnye, gevolg deur ’n laag mosterd, emmentalerkaas en vars origanumblaartjies. Rooster dit onder die warm element.

Kyk hoe vorder die sop As die blomkool sag is, gebruik ’n staafmenger om die sop fyn en glad te kry. Roer die melk by en verhit dit tot kookpunt.

Roer die kaas deur tot dit gesmelt is, proe en geur dit na smaak met sout en varsgemaalde swartpeper. >