Peer-en-karamelpoeding
Jy kan dié poeding vooraf bak, maar moenie die karamelsous oorgooi nie. Verhit dit vir ’n paar minute in die oond net voordat jy dit wil voorsit, en gooi dan die warm karamelsous oor.
Genoeg vir 6 Bereidingstyd 20 minute Baktyd 50 minute
Jy benodig
VIR DIE PERE • 3 pere • fyngerasperde skil en sap van 1 suurlemoen • 2 kaneelstokkies • 2 steranyssade • 4 kardemompeule, gekneus
VIR DIE FRANGIPANEVULSEL • 140 g botter, plus ekstra vir smeer • 140 g suiker • fyngerasperde skil van 1 suurlemoen • 3 eiers • 180 g amandelmeel • 60 g koekmeel • ¾ teelepel (3,75 ml) bakpoeier • 50 g amandelsvlokkies
VIR DIE KARAMELSOUS • 160 g suiker • 160 ml water • 40 g botter • 100 ml room
Só maak jy
Skil die pere, sny dit in die lengte in kwarte en sny die klokhuis uit. Sit die pere saam met die suurlemoenskil en -sap plus die speserye in ’n kastrolletjie en bedek dit met water. Verhit tot kookpunt en laat dit prut tot die pere net-net sag is (15-20 minute).
Maak die frangipanevulsel Verhit die oond tot 180 ºc. Smeer ’n ronde of vierkantige tertbord van 20 cm met botter. Room die botter, suiker en suurlemoenskil tot dit lig en donsig is. Klits dan die eiers een-een by. Meng die amandelmeel by en vou dan die koekmeel, bakpoeier en ’n knippie sout deur die beslag. Krap die beslag uit in die tertbord en rangskik die pere bo-op. Sprinkel die amandelvlokkies oor. Bak dit vir ongeveer 50 minute tot dit goudbruin is maar nie heeltemal droog nie. (Moet dit veral nie oorgaar maak as jy beplan om dit later weer op te warm nie.)
Maak die karamelsous Meng die suiker en water in ’n kastrolletjie en verhit dit dan oor lae hitte totdat dit ’n karamelkleur kry. Moenie dit roer nie – kantel die kastrolletjie elke nou en dan sodat dit eweredig van kleur verander (dit sal omtrent 10 minute neem). Roer dan dadelik die botter en room vinnig deur die karamelstroop en laat dit vir ongeveer 3 minute prut. Jy kan die sous nou in die yskas bêre en later weer verhit. Gooi die helfte van die warm karamelsous oor die tert en sit die res in ’n bekertjie voor. Sit die poeding warm voor met tuisgemaakte vla en/of roomys.