Nuus en dagboek Potte van binnebande plus kursusse te kus en keur
Ons is gaande oor Van der Vloed & Skaamhaai se reeks handgemaakte plantpotte – wie het gedink ou trekkeren ander binnebande kan in hulle tweede lewe so welgevormd lyk?
Met Platteland se besoek aan Nieu-bethesda in die Oos-kaap (lees die storie op bl. 18) het ons die Gautengse tuinontwerper Barry Slabbert buite Die Waenhuis raakgeloop waar hy besig was om ’n verskeidenheid droogtebestande plante in swart rubberpotte te plant.
Dié eiesoortige potte, wat onder die handelsmerk Van der Vloed & Skaamhaai verkoop word, is ’n samewerkingsprojek tussen Barry en die Cullinanse kunstenaar en produkontwikkelaar Magda van der Vloed en haar man, Rufus. Barry, wat in sy professionele hoedanigheid en onder sy vriende ook as James Barry bekend is, het die verskillende vorms ontwerp, terwyl Magda en Rufus die stikwerk en fyner afronding behartig.
“Ek wou iets doen met herwinbare goed wat net weggegooi word, soos binnebande... daai ding wat ’n mens noem making love out of nothing at all! En ons wou pret hê in die proses, veral met die beskrywende (Afrikaanse) name wat ons vir die verskillende vorms uitgedink het: frommelore, koekblikke, vlotterkleppe (Afrikaans vir valve), knorpotte, oorknypers, toktokkies, sonvisse...
“Ek is mal oor die gevoel van die versameling: aan die een kant tuisgemaak, aan die ander kant kontemporêr; half van die plaas af, half S&m’erig, half tong in die kies. En ek hou verder daarvan dat die potte mettertyd ’n lieflike patina kry,” verduidelik hy.
Barry en Magda-hulle wil met nog kunstenaars saamwerk om die reeks verder uit te brei en hy voel sterk daaroor dat elke potversameling met plante van die omgewing moet spog.
“Vir die potte wat by Die Waenhuis ten toon gestel word, het ek net plante gebruik wat hier in die Karoo voorkom of wat hier sal aard. In Johannesburg het ek weer ’n klompie vir die modeontwerper Marianne Fassler gemaak en sy het besluit om groente daarin te plant.”