KOM MAAK HIER ’N DRAAI!
TONTELDOOS
Die dagboekinskrywing in julle Herfsuitgawe oor die Highlandsfees wat op 15 April op Tonteldoos sou plaasvind, het my laat terugdink aan ons lekker Paasnaweekkuier op die dorp en veral die verblyf by Flintlock Grange met sy enorme huisbiblioteek.
’n Sonsondergang op Tonteldoos is onbeskryflik mooi, die hemelruim verlig met sterre wat soos helder ligte skyn, en die stilte ’n voorreg om te ervaar.
Francois en Helen Malherbe van Flintlock Grange is ook nie jou gewone gasheer en -vrou nie: Hulle gee regtig om vir hulle medemens én vir die voortbestaan van plekkies soos Tonteldoos. Hulle reël paramedici, stel veld op die plaas beskikbaar vir parkeerplek en reël selfs ’n priester uit Belfast om Nagmaal by die huis te bedien!
Gaan kuier daar en ervaar plattelandse gasvryheid op sy beste! Pietro Schmidt, MORNINGHILL
KAMPERSRUS
Min mense weet waarskynlik van Kampersrus, maar dié stuk pad van 15 km hoort op die toerplan van almal wat in die rigting van die Krugerwildtuin mik.
Net voor jy van die R527 afdraai op die R531 na Orpen, is daar die Laaipunt-padstal met allerlei snuisterye en ook vars avokado’s, sitrus en mango’s in seisoen. Langsaan is ’n kunsgalery en ’n bekende reptielpark.
’n Paar kilometer verder wag die Wag-’n-bietjie-padstal met ligte etes, vars plaasprodukte, en speelplek en ’n streelpark vir die kinders, en ’n klipgooi verder is 24° South met nog lekker kos en ’n uitstalling van ou motors.
Die idilliese Wildebeeslapa wink ’n ent verder aan die regterkant waar jy nie die koffie óf hamburgers mag misloop nie. Dan volg Ambri Africa se kroeg met ’n uitsig voor jy teen die bult op ry. Daar teen die hang van die Drakensberg wag die mooiste skool in Suid-afrika: Laerskool Mariepskop.
Kom kuier. Kom honger. Jy gaan net 15 km ry. Elmarie de Meyer, KAMPERSRUS