Kyk, doen, eet en slaap
SABIE Bookman’s Corner
Maggies, maar hier is lekker boeke! En báie. Ook in Afrikaans is die verskeidenheid nuwe en tweedehandse leesstof groot. En by Coffe Etc., die koffiewinkeltjie wat deel uitmaak van die boekwinkel, kan jy ’n geroosterde broodjie of ’n sny koek saam met jou koppie koffie bestel. Louis Trichardtstraat. 013 764 2074
Sabie Brewing Company
By dié brouery kry jy nie net bier uit die boonste rak nie, maar ook puik kos. En die atmosfeer en diens is van só ’n aard dat jy gaan sukkel om weg te kom. Hoofweg.
sabiebrewery.com 013 764 1005
The Wild Fig Tree
Dis ’n klein en gesellige restaurant, en die spyskaart verbaas ’n mens. Buiten die gawe pizzas, opgedolliede forel en koedoe is hier ook volstruisen krokodilsosaties én krokodilkerrie. Die Lowveldontbyt is ’n wenner. Louis Trichardtstraat. The Wild Fig Tree
013 764 2239
Mphozeni African Arts & Crafts
Jy gaan sukkel om nié iets hier te koop nie. Hier is mooi en interessante goed en die pryse is glad nie buitensporig nie. Laat Helen vir jou die fantastiese skaakstelle wys. Louis Trichardtstraat. 013 764 2074
Watervalle
Hier is ’n hele paar watervalle sommer naby aan die dorp. Jy kan op ’n middag by almal aangaan as jy wil. Maar die mooiste een is sekerlik Lone Creek, so 8 km noordoos van die dorp. Jy kan in die groot poel reg onder die waterval swem, en by die parkeerterrein is daar gras en braaiplekke. sabie.co.za
013 764 1177
Lew’s View
Hierdie netjiese houthuisie bestaan uit twee verdiepings. Bo kan vier mense slaap en onder ses. Albei eenhede kyk uit oor die gholfbaan. Hier is ook Dstv en ’n swembad. Bespreek deur die SA Tripsinligtingskantoor op Sabie. info@sabie.co.za
013 764 1177