JAMES KRIEL & LIZ VAN DEN BERG
Ekoterroris-en-heuningboer en kunstenaar
James se oupa het die stuk grond waar hy sedert einde 1991 woon, in 1972 gekoop. Hier lei hy ’n eenvoudige, stil en in vele opsigte idilliese lewe. Op die plaas is ’n staproete met ’n waterval of twee, die suiwerste bergwater, ’n selfsorgrondawel wat hulle verhuur (sien bl. 33) en natuurlik manjifieke fynbos wat James, ’n sogenaamde “ekoterroris”, probeer bewaar.
“Suid-afrikaners is nie juis into fynbos nie,” sê James, “maar die Duitse toeriste! Hulle vra die intelligentste vrae en weet die meeste van die tyd meer as jy!”
Liz, sy lewensmaat, is ’n kunstenaar wat onder meer Japannese visafdrukke ( gyotaku) maak. Sy woon die afgelope sewe jaar op die plaas, maar trek in die somermaande, wanneer dit hoogseisoen is in die advertensie-, TV- en rolprentbedryf, dikwels Kaap toe om daar as dekorskilder ’n inkomste te verdien.
James het by sy ma geleer om bossies veldblomme te maak en het sy hande vol met hulle 50 byekorwe wat gereeld deurloop onder die ratels, terwyl Liz, oorspronklik ’n Vrystater wat al 34 jaar ’n vegetariër is, planne moes beraam om die bokke en ander gediertes wat uit die berg kom, uit hulle groentetuin te hou. “Maar as jy eers hierdie stilte ervaar het,” sê Liz, “weet jy jy sal nooit weer vir altyd in die stad kan bly nie.”