ALBERT & SUSAN VAN DEN BERG
Nuwe intrekkers en kosmakers
Die Van den Bergs, wat die afgelope ses jaar tuis was in die Cotswolds in Engeland, is blinknuwe B’bossers – so nuut dat die meeste van hulle goed nog in bokse staan en heelwat restourasie- en aanbouwerk eers afgehandel moet word voordat hulle volledig kan intrek in die huis waar hulle skaars twee weke voor Platteland se besoek nesgeskop het.
Albert is passievol oor ’n paar dinge (behalwe Susan): kosmaak, meganika en radiobeheerde vliegtuie. Hy het 28 jaar op oliebore reg oor die wêreld gewerk, en in dié tyd het hulle in Kaapstad, Paternoster (13 jaar) en Switserland (2 jaar) gewoon voor hulle Engeland toe is.
Op Paternoster het hulle vriende geraak met die sjef Suzi Holtzhausen, en dis sy wat oor Skype vir hulle vertel het van Baardskeerdersbos en vir hulle gevra het of hulle haar nie Paasnaweek vanjaar met ’n spesiale ete by Lokal wil kom help nie. Daardie einste naweek het hulle hulle huisie in die hoofstraat gekoop en aan hulle plattelandse feëverhaal begin skryf. Hulle wil ’n klein kerrierestaurant by die huis begin, Albert wil vir hom ’n nuwe werkswinkel bou en aan die agterkant van die huis moet twee woonstelle kom wat hulle aan naweekbesoekers wil verhuur.