Eet, drink, wees plesierig
Doen, drentel, koop Baardskeerderbos-kunsroete Verken die kunsroete op Saterdag 23 en Sondag 24 September van 10:00-17:00. Minstens 10 kunstenaars van die omgewing gooi op dié dae hulle ateljee oop vir die publiek – gaan kyk en koop kuns en gesels oor ’n glas wyn met die kunstenaars. Besoek die webwerf vir ’n kaart en meer inligting. Waar? Verskeie ateljees op en om die dorp.
Kontak baardskeerdersbosartroute.co.za info@baardskeerdersbosartroute.co.za
Skaapkopfees
Die NG kerk op B’bos hou op 4 November van 10:00 tot laatmiddag ’n Skaapkopfees met ’n beperkte aantal skaapkoppe wat vooraf teen R130 elk bespreek moet word (by Protea Flora in die Spar-sentrum op Gansbaai). Daar’s ’n biertent, boeremusiek deur die Rummikub-orkes en die Sharimbas-marimbaorkes van die Academia-skool op Gansbaai, kosstalletjies, trekkerritte, boeresport en die heel eerste Mnr. en Mej. Baardskeerdersbos-kompetisie.
Kontak skaapkopfees@gmail.com 082 499 0230 (Aletta Groenewald)
Bak brood saam met Niël Jonker
Kry die kuns van suurdeegbrood onder die knie by een van die tweedagbroodbakkursusse wat die kunstenaar Niël Jonker by sy huis aanbied. Dit kos R1 800 p.p. en word in 2017 nog op 28-29 September, 26-27 Oktober, en 23-24 November gehou.
Kontak nieljonker.co.za (klik op “Workshops” bo en dan “Breadmaking Workshops”) info@nieljonker.co.za
B’bos-kunsgalery
Ivan Trollip se agtergrond as landskapkunstenaar vind neerslag in sy olie- en akrielverfskilderye van die natuur, blomme, veldblomme en voëls. Gaan kyk en koop by sy galery, wat ook sy huis en ateljee is.
Kontak ivantrollip.co.za B”bos Art Gallery
B’bos-winkel-en-drankwinkel
Tant Mara en wyle oom Manie Groenewald se dogter, Wilmien, en haar man, Danie Fourie, bestuur reeds die afgelope vyf jaar die dorp se enigste algemenehandelaars-en-drankwinkel waar jy basiese kruideniersware, alkoholiese verversings en van die legendariese Baardskeerdersbosorkes se CD’S kan koop en ook brandstof kan ingooi.
Kontak 082 412 4488 (Danie) of 084 573 1643 ( Wilmien)
Koop erfenissaad Maak ’n afspraak met Sue Vingerhoets om van haar erfenissaad of haar man, Jan, se funksionele kuns te koop. Kontak foxglove.co.za redeux.co.za suefoxglove@gmail.com
Platbos
Besoek Afrika se suidelikste natuurlike woud (sowat 13 km van Gansbaai af). Loer in by die kwekery, probeer een van die staproetes of verwonder jou aan die reuse- inheemse bome, voëls en ander velddiere.
Kontak platbos.co.za info@platbos.co.za
Voetslaan deur die fynbos
Gaan op ’n begeleide of onbegeleide tweeof driedagstaptog (met of sonder etes) deur die Kaapse blommeryk en die skouspelagtige natuurskoon van die Overberg.
Kontak fynbostrail.co.za info@fynbostrail.co.za
Ma, ek is honger! Lokal in B’bos Slegs een naweek per maand kan jy aansit vir ’n spesiale seisoenale vierof vyfgangmiddagete wat die Weskussjef Suzi Holtzhausen optower by Lainy en Stanley Carpenter se lieflike “popup” restaurantruimte in die hoofstraat. Platteland het R425 p.p. betaal vir ’n masalafeesmaal wat elke sent die moeite werd was. Saam met Suzi se gesofistikeerde dog onpretensieuse kos kan jy van die kontrei se beste wyne bestel. Plek is beperk en besprekings noodsaaklik. ( Teken op die webwerf op hulle nuusbrief in of hou die Facebookblad dop vir datums en temas.) Daar is ook deliprodukte en van Die Werf se wyne te koop. Waar? Hoofweg 23.
Kontak lokalbbos. co.za LOKAL in B’bos book@lokalbbos. co.za 082 909 0512
Marietjie’s Pub & Grill
Veral oor naweke sak ’n tsoenami van viertrekvoertuie, gesinsmotors en ysterperde toe op dié kuierplek wat al amper 11 jaar sake doen – of dit nou vir sporten’ ndop by die kroegtoonbank, die beroemde boereontbyt of enige van die ander waardevirgeldtreffers op die spyskaart is. Laasgenoemde wissel van ribbetjies, burgers en schnitzels tot seekos of boerekos op Sondae. Laat die boodskap agterop Marietjie se Themp – “Ons lyk nie so van draf nie... dis van vreet” – vir jou ’n waarskuwing wees: Die grootte van die porsies laat menige lekkerbek se broek bewe en die meeste keer huiswaarts met ’n woefkardoes. In die een hoek is ’n rak met tuisgebakte beskuit, koekies, konfyt en van tant Mara se kersies in... ja, reg geraai, witblits, wat te koop is. Waar? Hoofweg. Kontak Marietjies pub & grill marietjiespub@gmail.com 072 452 5210
Strandveld Pub, Restaurant & Functions
Callie Lindes – ’n ou hand as dit by kontreistories kom – is aan diens by die kroegtoonbank, en sy vrou, Mariana, woeker in die kombuis by dié kuierplek in wat eens Baardskeerdersbos se skool was. Kom lawe die keel, bestel onder meer steak, calamari, burgers, schnitzels of vars vis vir die hongerpyne, of bespreek vir ’n spesiale ete op byvoorbeeld Moedersof Vadersdag. Elke tweede Woensdagaand wys tant Mara Groenewald waar Dawid die wortels gegrawe het wanneer ’n klomp inwoners hier saamtrek vir ’n paar potte rummikub. Die Rummikubboereorkes maak dan musiek waarop jy kan skoffel. Dit is ook hier waar die plaasmark op die laaste Saterdag van die maand gehou word en waar Callie en Mariana dan skaapkop, vaalafval en kerrieafval verkoop. Waar? Strandveldstraat.
Kontak Baardskeerdersbos Strandveld Pub, Restaurant & Functions 082 940 2655 of 079 351 0468
B’bos-waenhuis (Rusty’s Treintjie Pub & Danssaal)
Platteland het nie hier uitgekom nie, maar ons verneem as jy hou van boeremusiek en langarm, is hierdie kroegendansplek van die countrysangers Rusty en Danie Groenewald dié plek om ’n Saterdagaand te verwyl. Waar? Hoofweg. Kontak Rusty’s Treintjie Pub 072 257 8474
Blyplek Daar is verbasend min blyplek op die dorp self, maar ’n skaflike verskeidenheid in die omgewing. Loer op Niël Jonker se webwerf,
nieljonker.co.za, en klik boaan die bladsy op die “Workshops”balkie en dan op “Breadmaking Workshops” – laer af is verblyfopsies.
Tierfontein-rondawel
Platteland het tuisgegaan in Liz van den Berg en James Kriel se smaakvol gemeubileerde rondawel (met ’n en suitestortkamer en ’n kompakte aparte kombuis) op ’n plaas 7 minute per motor buite die dorp. Saans gebruik jy kerse en olielampe, en verder werk alles met gas of sonkrag (daar is wel in die kombuis ’n elektriese yskassie en ’n kragpunt vir fone of rekenaars). Handdoeke word verskaf en braaihout is te koop.
Kontak tierfonteinrondawel.com tierfontein@gmail.com 083 306 8882
Rusthof
’n Goed toegeruste drieof vyfslaapselfsorghuis met braaigeriewe is te huur op ’n plaas 5 km buite die dorp. Kinders en troeteldiere is welkom. Kontak rusthofaccommodation.co.za Rusthof Akkommodasie langenhovenchrista@gmail.com 082 300 7294