Die Karoo op sy beste
Almal weet van die Karoo- nasionale park, maar dis steeds asof die meeste mense nie besef wat ’n wonderlike reservaat dit is nie. Baie naby aan dié tweespoorpad (in die rigting van Doornkloof) hou die reservaat se troppie leeus waarvan Sylvester, die reeksontsnapper, ook eens op ’n tyd deel was. Dis net om die draai van die ruskamp en nie ver van die N1 af nie. Hier is báie wild: Kaapse bergkwaggas, rooihartbeeste, springbokke, koedoes, gemsbokke, klipspringers... Ons het selfs ’n erdvark in die pad gekry toe ons ná sononder in die reservaat aankom – iets wat die kinders vir ’n rare oomblik stil gehad het.