VELHANDEL BEDREIG ARM GEMEENSKAPPE
Van die meer as 40 miljoen donkies ter wêreld is ongeveer 96% in onderontwikkelde lande, waar hulle hoofsaaklik as pakof trekdiere ingespan word.
Tog is die donkievelbedryf ’n groot bedreiging vir die inkomste van dié arm gemeenskappe. Donkies word al hoe meer verkoop of gesteel vir die gelatien wat uit hulle velle verkry en dan in “gesondheidsprodukte” vir die Chinese mark gebruik word.
Talle Afrikalande het die handel in donkievelle verbied, maar teen druktyd was Suidafrika nog nie een van hulle nie. In Mei het die batebeslagleggingseenheid van die Nasionale Vervolgingsgesag ’n bewaringsbevel verkry vir donkievelle ter waarde van R4 miljoen waarop beslag gelê is op ’n plot in Benoni.