HOESÊ?

INFUSIE is die woord wat gebruik word om kruietee met sagter plantmateriaal (gewoonlik blare of blomme) te maak. Bedek eenvoudig die vars of droë plantmateriaal met kookwater van omtrent 90 ºc (laat die water vir 5-10 minute in die ketel afkoel voor jy dit gebruik) en, baie belangrik, bedek die pot of houer met ’n deksel of piering, anders sal die vlugtige olies in die stoom verdamp en die medisinale waarde verlore gaan. Laat dit vir 10 minute trek en skink dan die tee. Versoet dit met heuning, indien verkies.

DEKOKSIE is wanneer harde plantmateriaal – meestal wortels, saad of bas – gebruik word om tee te maak. Plaas die plantmateriaal in ’n emaljekastrol, bedek dit met koue water, sit die deksel op en verhit dit stadig tot dit net-net prut. Verlaag dan die hitte en laat dit vir 15-20 minute prut (maar nie vinnig kook nie). Laat die mengsel vir ’n paar minute staan om effens af te koel en gooi dit deur ’n fyn siffie om die plantmateriaal en vloeistof te skei. Die vloeistof staan bekend as ’n dekoksie en kan warm of koud gedrink word. Gooi die plantmateriaal op die komposhoop.

TINKTUUR Dit is ’n alkoholiese plantekstraksie wat gemaak word deur vars of droë plantmateriaal vir etlike weke in alkohol te week sodat die aktiewe bestanddele en sekondêre metaboliete in die alkohol kan oplos. Verskillende konsentrasies alkohol van hoë gehalte word gebruik om verskillende aktiewe bestanddele uit die plantmateriaal te onttrek. Nadat dit ’n paar maande getrek het, is daar verskillende prosesse wat gebruik word om die vloeistof van die plantmateriaal te skei. Die vloeistof word ’n tinktuur genoem en moet in donker glasbottels gebêre word. >