Varkoortjies

Centellaasiatica

Ander name Pennywort, bubbles, little pig’s ears (Engels); brahmi (Hindi)

Die immergroen meerjarige grondbedekker Centella asiatica het ronde of niervormige blaartjies op lang stele en word allerweë as een van die top 25- medisinale plante ter wêreld beskou.

Medisinale gebruike Danksy die anti-inflammatoriese en anti-allergiese eienskappe word die hele plant al eeue lank in die Ooste én Weste gebruik om allerlei vel-, urineweg- en senuweeprobleme te behandel. Heelwat farmakologiese navorsing is intussen gedoen wat gelei het tot die identifisering van die aktiewe bestanddele wat wondgenesing en die vorming van gesonde weefsel bevorder. ’n Tee wat van die blare getrek is, is uitstekend om spanning en ander senuweetoestande te verlig, en meer onlangse navorsing fokus op die rol wat Centella in die voorkoming van ouderdomsverwante neurologiese degenerasie kan speel. Ander toestande wat hiermee behandel word, is swak bloedsomloop, artritis, ekseem, spatare en rekmerke.

Kweek dit self Varkoortjies sal in volson tot volskaduwee groei en vinnig uitsprei mits dit in klam, komposryke grond geplant is. Hulle is rypsensitief.