6 goeie redes om artisjokke te kweek

1 KOS Artisjokplante produseer groot groen distelagtige blomme – as jy dit oes voor die blomme oopgaan, is dit ’n heerlik veelsydige lekkerny met ’n unieke aardse, neuterige geur. Die blomme bevat sinarien, ’n verbinding wat die smaakknoppies stimuleer en lawwe kos glo beter laat smaak.

2 GESONDHEIDSVOORDELE Artisjokke is ’n goeie bron van fitochemiese stowwe en vesel, en bevat ook vitamien C, foliensuur, magnesium, kalium, fosfor, koper en mangaan (trouens, geen ander groentesoort bevat méér magnesium en kalium nie). Hulle is propvol polifenole en flavonoïede, twee antioksidante wat die kans op ’n beroerte verlaag. Boonop kan dit jou hart help beskerm omdat dit cholesterolvlakke verlaag – dis danksy die sinarien, wat die lewer se produksie van gal opstoot en die vloei van gal uit die galblaas aanhelp. Gal speel ’n sleutelrol in die uitskeiding van oortollige cholesterol uit ons liggaam. Artisjokke word in alternatiewe geneeskunde gebruik om spysvertering aan te help. Hulle is ryk aan inulien, ’n prebiotika wat die groei van voordelige bakterieë in die spysverteringskanaal aanhelp. Volgens antieke volksoorlewering kan die artisjok nie net ’n voorbehoedmiddel wees nie, maar ook ’n seksstimulant.

3 TUINDRAMA Die plante vra nie baie aandag nie, maar hulle groot ornamentele silwergroen blare verhoog die dramatiese trefkrag van enige tuin. En as jy nie die blomknoppe oes om te eet nie, ontwikkel hulle in die lente tot ’n pers skouspel wat talle voordelige insekte soos bye, houtkapperbye en vlinders lok.

4 BLOMMEKUNS Die blomme – oop, toe en selfs droog – én die stekelrige ornamentele blare verrig wondere in enige blommerangskikking.

5 KOMPOSKONINGS Artisjokke is dinamiese opgaarplante (plante wat spesifieke minerale uit die grond opneem en dit in die stele en blare berg). As jy die blare afsny en op die komposhoop gooi, stel jy dié minerale beskikbaar aan ander plante waarby jy die kompos gebruik. Boonop is die meeste dinamiese opgaarplante goeie komposaktiveerders.

6 WINSKOOP Dié fynproewerskos is enige lui tuinier se droom, maar dra in supermarkte ’n stewige prysetiket.