Artisjokpesto
Jy kan dié veelsydige pesto voorsit as ’n doopsous saam met groente- en broodstokkies, of roer dit deur gaar pasta van jou keuse óf probeer dit saam met gekookte baba-aartappels vir ’n byderwetse aartappelslaai. Die pesto vries goed. Maak 2 flessies van 250 ml elk Bereidingstyd 10 minute Gaarmaaktyd 30 minute
JY BENODIG
• 4 groot knoffelhuisies (met die skil) • ½ koppie (125 ml) amandelvlokkies,
liggies gerooster (sien die metode) • ’n hand vol roketblare • 1½ koppie (375 ml) vars gaar, geblikte of ingemaakte artisjokharte, gedreineer • sap en fyngerasperde skil van
2 suurlemoene • 1 koppie (250 ml) fyngerasperde parmesaankaas • ½ koppie (125 ml) olyfolie ( jy sal
dalk ekstra nodig hê)
SÓ MAAK JY
Verhit die oond tot 180 ºc. Draai die knoffel in foelie toe en rooster dit vir omtrent 20 minute tot sag. Sprei die amandels op ’n bakplaat uit en rooster dit vir ’n paar minute in die oond tot dit liggies begin verkleur. (Dié stap klink dalk na onnodige moeite, maar moenie probeer kortpaaie vat nie – die geur van die geroosterde knoffel en amandel is onverbeterlik.)
Verpulp die roketblare, artisjokharte en die sap van 1 suurlemoen saam in ’n voedselverwerker. Druk die sagte pulp van die knoffel uit en voeg dit saam met die suurlemoenskil, parmesaan en neute by die artisjokke en pols dit ’n paar keer. Drup die olyfolie in ’n dun straaltjie by en pols dit tot alles goed gemeng is.
Proe en geur dit na smaak met sout, varsgemaalde swartpeper en nog suurlemoensap. Jy kan ook nog olie byvoeg tot die tekstuur is soos jy daarvan hou. Bêre die pesto in die yskas en gebruik dit binne ’n week. Of skep dit in ’n sakkie en hou dit in die vrieskas. >