Gemarineerde artisjokke
Eksperimenteer gerus met geurmiddels van jou keuse. Dié heerlike artisjokke sal vir etlike weke in die yskas hou. Maak 1 groot fles Bereidingstyd 20 minute Gaarmaaktyd 10 minute plus marineertyd
JY BENODIG
• 8-10 vars jong artisjokke, skoongemaak
(aanwysings op bl. 100) • ½ koppie (125 ml) rooiwynasyn • ½ koppie (125 ml) water • 3 knoffelhuisies, in skyfies gesny • ½-1 rooi brandrissie, ontpit en fyngekap • 1 teelepel (5 ml) sout • 2 lourierblare • ¼ teelepel (1,25 ml) heel
swartpeperkorrels, gekneus • olyfolie
SÓ MAAK JY
Steriliseer ’n fles van sowat 750 ml. Pak die skoongemaakte artisjokke daarin sodat dit mooi knus pas.
Verhit die rooiwynasyn en water tot kookpunt, roer die knoffel, rissie, sout, lourierblare en swartpeperkorrels by en gooi dit oor die artisjokke. Gooi olyfolie bo-oor en sorg dat die artisjokke heeltemal met vloeistof bedek is.
Verseël die fles en skud dit goed. Laat dit buite die yskas staan tot die vloeistof heeltemal afgekoel het voordat jy dit in die yskas bêre en vir minstens 2 dae laat staan voordat jy dit gebruik.