Artisjok-en-lamsosaties

Die verskillende geure, kleure en teksture van hierdie gemarineerde sosaties maak dit ’n wenner.

Genoeg vir 4 Bereidingstyd 10 minute Braaityd 10 minute JY BENODIG

• 250 g lamsboud, ontbeen en in

blokkies van 2-3 cm gesny • 250 g gemarineerde artisjokke (resep op bl. 96) – jy kan ook geblikte artisjokke gebruik • 4 knoffelhuisies, fyngedruk • sap en skil van ’n halwe suurlemoen • ¼ koppie (60 ml) olyfolie • ½ teelepel (2,5 ml) heel komyn

of koljandersaad • ½ teelepel (2,5 ml) growwesout • ¼ teelepel (1,25 ml) varsgemaalde swartpeper • 1 rooiui SÓ MAAK JY Week 4 sosatiestokkies vir ’n uur of twee in water. Sit die lamsblokkies in ’n bak saam met die artisjokke, knoffel, suurlemoensap en skil, olyfolie, komyn, en sout en swartpeper en meng dit goed deur. Laat dit vir minstens ’n uur teen kamertemperatuur marineer. Sny die rooiui in 8 wiggies.

Ryg nou die stukkies ui om die beurt met die lamsblokkies en artisjokke op die sosatiestokkies.

Braai die sosaties oor matige kole tot dit goudbruin en mediumgaar is – dit behoort omtrent 8 minute te neem. Laat die vleis vir 5 minute onder foelie rus voordat jy dit voorsit met ’n doopsous van gekrummelde fetakaas, jogurt en fyngekapte mentblare.