Só maak jy dit skoon
1 Gebruik ’n skerp getande mes soos ’n broodmes om (ten minste) die boonste derde van die artisjok se blare af te sny – jy sal weet jy het genoeg afgesny as jy die pers blaartjies in die kern kan sien.
2 Trek die harde buitenste blare een vir een af tot die liggeel binneblare sigbaar is. Sny dan die stingel met ’n skerp groentemessie teen die basis af.
3 Sny die harde dele af waar die blare en die stingel bymekaarkom en gebruik dan ’n groenteskiller om die oorblywende stukkie stingel en die basis van die artisjok glad te sny.
4 Smeer die skoongemaakte artisjokke deurentyd met vars suurlemoen om te keer dat dit bruin word.
5 Sny die artisjokke in die lengte middeldeur. Knyp die klein pers blaartjies in die middel tussen jou vingers vas en pluk dit met ’n ferm beweging uit. Gebruik ’n teelepel om die harige kern uit te skraap. Al wat moet oorbly, is die liggeel sagte blare en die skoonbasis sonder enige “baard” of pers blaartjies.
6 Jy kan die artisjokke nou in kwarte sny as jy wil, maar sit dit dadelik in water met suurlemoensap om te keer dat dit bruin word. Die artisjokke is gereed om te kook, soteer of in te lê. As ’n resep spesifiek vir artisjokharte vra, breek jy die orige stuk stingel en enige oorblywende blare af – wat oorbly, is die hart.