Mielie-ontbytmuffins
Vir hierdie muffins gebruik jy eers van die eiers om roereier te maak – daarom is dit ’n stewige ontbythappie. Hulle is op hulle beste warm of teen kamertemperatuur – moenie dit in die yskas hou nie. Maak 12 muffins Bereidingstyd 20 minute Baktyd 15 minute
JY BENODIG
• 3 eetlepels (45 ml) botter • 6 eiers • 1½ koppie (375 ml) mieliepitte • 2 eetlepels (30 ml) heuning • 1 koppie (250 ml) meel • ½ koppie (125 ml) mieliemeel of polenta • ½ eetlepel (7,5 ml) suiker • 1 teelepel (5 ml) sout • 2½ teelepels (12,5 ml) bakpoeier • ¼ teelepel (1,25 ml) koeksoda • ’n knippie varsgemaalde swartpeper • 2 teelepels (10 ml) rissievlokkies • ¼ teelepel (1,25 ml) gerookte paprika • 1 koppie (250 ml) melk • ¼ koppie (60 ml) botter, gesmelt • ½ koppie (125 ml) fetablokkies • 1 koppie (250 ml) sterk cheddarkaas
SÓ MAAK JY
Verhit die oond tot 200 ºc en smeer die 12 holtes van ’n standaardmuffinpan.
Smelt 1 eetlepel botter in ’n pan en roerbraai 4 van die eiers daarin. Skep die roereier uit en hou dit eenkant. Smelt die oorblywende 2 eetlepels botter in dieselfde pan en braai die mieliepitte. Voeg die heuning by – die mielies moet karamelliseer en goudbruin word.
Meng die meel, mieliemeel, suiker, sout, bakpoeier, koeksoda, swartpeper, rissie en paprika saam. Klits die melk, die ¼ koppie gesmelte botter en die orige 2 eiers saam, en vou dit deur die meelmengsel. Vou laastens die gebraaide mielies, roereier, feta en cheddar deur die beslag en meng dit goed deur. Verdeel die beslag tussen die muffinpan se holtes en bak dit vir 15 minute of tot ’n toetspen skoon uitkom.
Sny die muffins deur en sit dit voor met ’n smeersel botter en kaas.