April se eiers

Moenie skrik vir die ansjovis óf roosmaryn nie – hierdie ryk resep uit April Bloomfield se boek A Girl and her Pig verhef die nederige eier-vir-ontbyt tot ’n lekkerte wat jou gaste nie gou sal vergeet nie. Ryk en lékker!

Genoeg vir 4 Bereidingstyd 15 minute Gaarmaaktyd 20 minute

JY BENODIG

• 2 eetlepels (30 ml) botter plus ekstra om te smeer • 1-2 knoffelhuisies • 1 teelepel (5 ml) vars roosmarynblaartjies • 3 ansjovisfilette, fyngekap • 6 eetlepels (90 ml) dik room • ½ teelepel (2,5 ml) fyngerasperde suurlemoenskil • 4 eiers • 4 knippies droë brandrissievlokkies • 4 knippies soutvlokkies • 4 teelepels (20 ml) crème fraîche of roomkaas

SÓ MAAK JY

Verhit die oond tot 200 ºc en smeer vier ramekinbakkies met botter. Kap die knoffel en roosmarynblaartjies saam tot dit baie fyn is. Verhit ’n pan oor matige hoë hitte, laat die botter smelt tot dit begin borrel, en voeg dan die knoffel en roosmaryn by. Roerbraai dit liggies, maar haal die pan van die plaat af sodra die knoffel liggies begin verbruin. Roer dan die fyngekapte ansjovis by.

Roer die room en suurlemoenskil by en verhit dit weer tot die mengsel begin prut. Verdeel die roommengsel tussen die 4 ramekins. Breek ’n eier in elkeen. Sprinkel brandrissievlokkies en sout oor en skep ’n teelepel (5 ml) crème fraîche bo-op elkeen.

Sit die ramekins in ’n oondbak waarin dit taamlik knus pas en gooi versigtig kookwater in die bak sodat dit teen die kante van die ramekins opkom tot omtrent dieselfde vlak as die room.

Bak dit vir 18-20 minute of tot die wit gestol het en die eiergeel nog loperig is – moenie dit te lank bak nie. Sit dit dadelik voor met roosterbrood. >