Op ’n Vrydagmiddag is die Laerskool Roossenekal se sportterrein aan die buiterand van die dorp ’n malle miernes van mense, maar vandag word hier nie kinders op- of afgelaai nie: Die jaarlikse Geelvarkoorfees is op hande en op die grasperk word verwoed laaste stalletjies opgeslaan. By ’n klompie ander kraampies word al flink sake gedoen.
Suzette Hïnd, wat in beheer is van dié afdeling, stap rond met ’n tweerigtingradio en tussendeur die bevele spreek sy haar teleurstelling uit omdat Platteland weens onvoorsiene omstandighede nie die “eintlike storie, die hoofstorie – die musiekmakers en gospelfees en biertuin en boeresports en bergfietsresies en Miss Arum Lily” die volgende dag kan bywoon nie.
Dis ’n jolige gemeenskapsgedoente wat in 2017 sowaar al die 16de keer gehou is, vertel Suzette – nie net om die omgewing se bedreigde geel varkoor ( Zantedeschia
pentlandii) en besienswaardighede bekend te stel en toerisme ’n hupstoot te gee nie, maar om só ook hopelik te help met die geweldige werkloosheid in die distrik.
Suzette se walkie talkie kraak. Sy moet gaan. “Geniet dit, kêrels,” sê sy, “en dankie vir die ondersteuning.”
• Die datums vir 2018 se Geelvarkoorfees was teen druktyd nog nie gefinaliseernie, maar die fees sal vanjaar waarskynlik vroeër in November plaasvind.
HOOFFOTO BO Die geel varkoor ( Zantedeschia pentlandii) is ’n bedreigde spesie wat in die natuur tot die Mapochstreek in Mpumalanga beperk is. INLAS HEEL BO Een van die moderne geel Zantedeschia aethiopica- kultivars wat Afriflowers buite Cullinan na die fees toe gebring het. LINKS EN INLAS BO Danielle de Lange en Elsie Gouws, albei van Brakpan, was aan diens by dié gilgeel stalletjie wat behoort aan Elsie se ma, Suna, en waar alles van koel en warm lafenis tot dekor, kuns, plantjies en toebroodjies te koop was.
BO Florence Muneri en Penalope Mavhura, albei inwoners van Roossenekal, was op hulle pos by Limpopo Tourism se inligtingtafel, waar hulle onder meer handgemaakte hoede, naaldwerk en groente verkoop het. Vir Platteland was die hoogtepunt egter Florence se emmertjies tuisgemaakte grondboontjiebotter wat sy teen ’n skamele R30 van die hand gesit het. “Dis regtig net grondbone en sout, en ek maak dit in my eie kombuis,” het sy belowe. Ons het haar die voordeel van die twyfel gegee en was in die wolke toe ons oplaas die eindproduk proe. golimpopo.com
ONDER Hennie du Toit van Witbank noem sy kostrokkie Food Galore, waar inderdaad diepgebraaide lekkernye te kus en te keur was. “Alles wat ek verkoop, is lekker – die spring rolls, dis vis- nuggets, die samoesas, die schnitzels – maar vir my is die chicken pops en die chickennuggets die lekkerste. Daai twee is gewoonlik ook my topverkopers.” 082 850 8641
BO Susan Wangari en haar broer, James, kom oorspronklik van Kenia, maar het hulle ’n hele paar jaar gelede in Johannesburg gevestig waar hulle by verskeie straat- en ander markte sake doen. By hulle stalletjie was ’n magdom sakke, hoede en handgemaakte sandale en armbande te koop. >