DE VRY SE PRODUKTE
Die Droë Rooinek Dry Gin
“Dit is ’n vars, droë jenewer met talmende sitrus-, peperagtige en blommenote, maar nie juniper-driven nie,” sê Pasch, al tel jenewerbessies onder die 14 botaniese byvoegings, wat ook koljander, angelika, kamille, kassia, suurlemoen, lemoen, die plaas se kakiebos, kosmos en pienk peperkorrels insluit. Die broers verouder tans ’n beperkte hoeveelheid hiervan in vaatjies en sal hulle “derde” jenewer vrystel sodra dit na hulle smaak is.
Die Soet Rooinek Cherry Gin
Plomp, ryp, pikswart kersies word met die hand gepluk deur Pasch se skoonpa, Gys du Toit van Du Toit-vrugte op Ceres. Die vrugte word dan liggies gekneus en die vrugte (en pitte) in Die Droë Rooinek Dry Gin geweek. Wanneer die kleur en geur reg is, word die jenewer, wat nou met eiesoortige rypvrugte-, amandel- en speserygeure spog, gefiltreer en gebottel. Onverbeterlik net so of saam met Fitch & Leedes se tonikumwater.
Die Warm Rasta Rum
’n Vatverouderde, 100% natuurlike rum was boaan die drie broers se wenslys en hulle het groot moeite gedoen om die regte vaatjies te kry, die vate te skroei en met die verouderingstyd te eksperimenteer. Dis vanselfsprekend nie gemik op mense wat rum gewoonlik saam met Coke geniet nie, en al is ons hier by Platteland nie eintlik rumdrinkers nie, het dié sysagte karamel skoon oor ys ons onmiddellik oortuig om ’n bottel aan te skaf.
Die Groot Komunis Vodka
“Vodka was nooit deel van ons planne nie, en het buitendien mos die reputasie dat hy jou blind en simpel maak. Hy moet ook eintlik na niks smaak nie, want dit gaan oor wat jy daar bygooi,” sê Gerrit. De Vry se vodka word drie keer gedistilleer en verkieslik yskoud en skoon gedrink om die botter- en beskuitjiegeure te waardeer.
(“Komunis”metneteenm? Dalkhetiemandtediepindie vodkabottelgekyk?–reds.)