Daar’s hy, daar’s hy... waar’s hy?

Die Weskus wemel ook van romantiese bouvalle. Net buite Elandsbaai is die ruïnes van die eens indrukwekkende Kaaps-hollandse kompleks Klaarefontein, ’n plek wat lady Anne Barnard glo op haar reise die binneland in aangedoen het. Tot nie so lank gelede nie het daar nog mense in die plaashuis en buitegeboue gewoon, maar vandag staan dit sonder dak of vensters daar. Dis meer as twee eeue se geskiedenis wat hier stadig soos mis voor die son verdwyn – met meer as net ’n bietjie hulp van vandale en diewe die afgelope paar dekades.