MIC SE RUBRIEK
Snorkels is nie net vir water nie
Die hooffunksie van ’n snorkel is om jou voertuig te help om sonder ’n hik of ’n sluk deur diep water te ry. Dis waarvoor dit ontwerp is.
Die meeste 4x4’s se luginlaat is binne die voorste modderskerm bo die voorwiele geleë. Die hoogte van ’n ryding se luginlaat bepaal meestal sy dompeldiepte, maar daar is ook ander faktore – soos die ligging van die elektronika – wat ’n rol speel.
Meer voertuie word deur water beskadig as deur enige ander veldhindernis, daarom is maatreëls wat keer dat vloeistof in die enjin ingesuig word, nie geld in die water nie. ’n Voertuigsnorkel help jou nie net deur diep water nie, sê die 4x4-kenner MIC VAN ZYL.
’n Vuil, verstopte lugfilter sal die invloei van lug belemmer, wat tot hoër brandstofverbruik en ’n verlies aan enjinkrag lei. Dit is aanvanklik nie ’n noemenswaardige verskil nie, maar dit kan erger raak as die voertuig nie gediens word nie. Mettertyd sal jy dit aan jou sak voel of kan jou lugfilter ingee. Dan sal vuil lug ongehinderd by jou enjin instroom en duur probleme veroorsaak.
Verkoelde lug
Dit gaan nie net oor die water nie
Die tipiese snorkel vir ’n 4x4 verskuif die luginlaat van die binnekant van die modderskerm na die buitekant van die voertuig op dakhoogte, wat beteken dat jou inlaatstelsel skoner, koeler lug kry. Sommige snorkelontwerpe laat jou selfs toe om die snorkel se kop te draai in erge stowwerige, reën- of sneeutoestande.
Snorkels word ook spesiaal ontwerp sodat lug in die snorkel ingeforseer word wanneer die voertuig op spoed beweeg. Dit gee die inlaatstelsel ’n hupstoot.
Die lugtemperatuur by die snorkelinlaat is gewoonlik ’n paar grade koeler as in die omgewing van die enjin, wat jou enjin ’n bietjie minder laat werk.
As jy op grondpaaie ry, moet jy dit sterk oorweeg om jou vierwielvoertuig of -bakkie met ’n snorkel toe te rus. Skoner, koeler lug sal jou op die langtermyn geld en onderhoud spaar. Onthou egter dat ’n snorkel alleen nie jou voertuig se dompeldiepte verbeter nie. Die elektronika, byvoorbeeld, sal ook waterbestand gemaak moet word.
Dit is onwaarskynlik dat jy elke dag deur diep water gaan ry, veral as jy (soos ek) dit probeer vermy. Dan gaan ’n snorkel nie hoog op jou lys van modifikasies wees nie.
’n Snorkel het egter ook ’n ander belangrike doel. As die luginlaat bo die voorwiel sit, beteken dit heelwat stof word by die inlaatstelsel ingesuig die oomblik dat jy die teerpad vir die grondpad verruil. Jou voertuig se lugfiltreerstelsel behoort die stof uit die lug te verwyder, maar as die filter sy werk doen, sal dit verstop raak.