SA SOLDATE RUS IN DAR ES SALAAM
Ou begraafplase interesseer my.
Toe ek onlangs in Dar es Salaam se besige verkeer sit, het ek ’n oorlogbegraafplaas in die besige Bagamoyoweg opgemerk en besluit om dit te besoek. Groot was my verbasing dat daar tussen die 123 rye grafte 61 is van Suid-Afrikaanse soldate wat in die Eerste Wêreldoorlog (vanaf 1914-1918) hier in Duits-Oos-Afrika, toe nog ’n Duitse kolonie, saam met die Britte teen die Duitsers geveg en gesterf het.
Die begraafplaas word mooi onderhou en is deel van die Common Wealth War Graves wat vanuit Engeland bedryf word.
Die grafte het vanne van wit, bruin en swart Suid-Afrikaners wat in die SA Army Road Corps, Veteranekorps en die Kaapse Korps gedien het.
Een graf wat my baie geïnteresseer het, was dié van ene kaptein L.J.H. Moolman van die Intelligensie-afdeling wat op 21 November 1918 gesneuwel het. Op die grafsteen, rondom die ou embleem van die Suid-Afrikaanse weermag, is die leuse: “Union is strength – Eendracht maakt macht.”
Ek was ’n trotse Suid-Afrikaner in die vreemde. Trots daarop dat ons soldate hier in Afrika kom veg het en dat hulle hier onder die Suid-Afrikaanse vlag gesneuwel het en eerbaar in so ’n netjiese begraafplaas ver van hul geliefdes in vrede kan rus.
Soldate van verskillende lande het teen mekaar geveg, mekaar doodgeskiet of gewond en geen genade getoon nie, maar hier in Dar es Salaam lê hulle saam in vrede begrawe.
Besoek die Common Wealth War Graves se webtuiste by www.cwgc.org vir meer inligting oor die grafte.