STADIG OOR DIE KLIPPE
Vandeesmaand gee Alan Goodway raad oor hoe jy veilig oor klipperige terrein kan ry.
Ons fokus vandeesmaand steeds op hindernisse. Voor jy oor klipperige gebiede ry, moet jy ’n paar dinge oorweeg. Die verkeerde lyn of benadering kan jou duur te staan kom, veral wat skade aan jou voertuig betref.
Inspekteer eers die roete te voet. Onthou dat die hoë punte van die roete soms tot jou voordeel kan wees – dit kan vir ekstra grondvryhoogte sorg as jy met jou bande daaróór, en nie daaróm nie, ry. Maak egter seker dat die hoë punte nie jou ryding se grondvryhoogte oorskry nie, anders sal jou kar hang of beskadig word.
Kyk uit vir klippe wat jy kan losry en wat jou voertuig sal beskadig, en kyk hoe stabiel die terrein is.
Sorg ook dat jy weet waar jou voertuig kwesbaar is. Weet byvoorbeeld waar jou voertuig se laagste grondvryhoogte is. Onthou ook dat dit moeilik is om egalig op ruwe terrein te bestuur en dat dit ongemaklik kan wees vir die insittendes. Maak dus seker daar is geen los voorwerpe binne of buite jou voertuig nie.
Stadig maar seker
Hou die slagspreuk “so stadig as moontlik; so vinnig as nodig” in gedagte. Om suksesvol oor die klippe te ry, kies die eerste laestrekrat en ry baie, baie stadig op jou gekose lyn. Jy kan dit selfs oorweeg om kort-kort die rem liggies te trap (feathering the brakes, soos die Engelse sê) as jy ’n outomatiese voertuig het. Hou die stuurwiel styf vas. Dis altyd beter as iemand jou oor die hindernis lei sodat jy nie jou voertuig se onderstel beskadig of vassit nie.
Bou ’n pad indien nodig. Pak rotse om te keer dat die motor se onderstel kap. Dra handskoene vir beskerming. Tel klippe wég van jou lyf af op – daar mag ’n skerpioen of ’n slang daaronder skuil. Veiligheid en pret is die wagwoord. En moenie jaag nie – jy is daar om die natuur te geniet.
As jy jou vaardighede wil slyp, sluit aan by die WegRy-4x4-aka-demie (sien die kassie onder) en laat die professionele ouens jou touwys maak.