Fortuner-vreter
Die Ranger-bakkie is een van Ford se grootste onlangse plaaslike suksesverhale. Maar mense het dadelik begin wonder wanneer Ford met ’n nuwe Everest vorendag sou kom om met die Toyota Fortuner, Chev Trailblazer, Mitsubishi Pajero Sport en Nissan Pathfinder mee te ding.
Die goeie nuus is dat Ford bevestig het dat die nuwe Everest in 2015 plaaslik bekend gestel word. Ons dink dit gaan nie net die mooiste ryding in dié segment wees nie, dit gaan ook ’n paar interessante kenmerke onder die vel hê.
Hy gaan die Ranger se 3,2 en 2,2 liter-turbodieselenjins hê, maar die groot verrassing is dat dit ook beskikbaar gaan wees met ’n turbo-aangejaagde 2 liter-petrolenjin. Sy elektroniese veldrystelsel is soortgelyk aan Land Rover se Terrain Response (Ford noem dit “Terrain Management”).
Ander elektronika sluit in blindekolsensors en snelheidsbeheer wat die voertuig outomaties laat rem vir stadiger voertuie voor hom. Die inligtingen-vermaakstelsel het ’n 8 duim-raakskerm en kan ook met stembevele beheer word.
Nes die Ranger-bakkie het dit ’n agterste ewenaarslot, grondvryhoogte van 225 mm en ’n dompeldiepte van 800 mm – die beste in sy klas. Binnelangs is daar drie rye sitplekke, met die agterste ry wat in die vloer platvou en die agterste laaideur wat elektries oop- en toemaak. Dit sal in 4x4- en 4x2-weergawes te kry wees.