WEELDE-4X4 VAN DIE JAAR

Land Rover Discovery SDV6 S

Om’n Weelde-4x4 van die Jaar uit die groot verskeidenheid luukse veldrygoed in die land aan te wys, het heelwat dinkwerk gekos.

Omdat daar soveel begeerlike weelde-rygoed is om van te kies, het ons laestrekratte as ’n vereiste gestel, selfs al weet ons dié soort rygoed sien bitter min régte veldrytoestande.

Dus is die keuse tot Jeep se Grand Cherokee- en nuwe Cherokee-modelle, Land Rover se Range Rover, Range Rover Sport en Discovery-reekse, Lexus se LX, Mercedes-Benz se GL en ML’s, die Mitsubishi Pajero (wat onlangs effens vernuwe is), en Toyota se Prado en Land Cruiser-reeks afgeskaal.

’n Hele paar van dié modelle, soos die ML, die groot Lexus en die Land Cruiser 200, kos al meer as ’n miljoen rand, en sal heel moontlik nooit in hulle leeftyd êrens anders as in die betonoerwoud gebruik word nie.

Dit laat ons dan met die Jeeps, die Land Rover Discovery, die Pajero en die Prado.

Hoewel die Prado ’n goeie veldryer is, steek sy krag – veral die turbodiesel s’n – sleg af teen die mededingers.

Die Pajero is, ondanks sy vernuwing, al lank in die tand, en die Grand Cherokee en Discovery skop stof in sy hoofligte.

Van al die Land Rovers is die Discovery waarskynlik die model met die beste veldryvermoëns. Hy is ook heelwat ligter as die Range Rover en is ook nie so op teerpadverrigting gemik soos die Range Rover Sport nie.

Ons dink die S-afwerkingsvlak (teen R815 400) is beter waarde vir geld as die duurder SE- en HSE-modelle, want dis steeds baie luuks met dieselfde Terrain Response-vierwielstelsel met verstelbare lugvering wat tot 310 mm se grondvryhoogte kan verskaf, en dieselfde puik 3 liter-SDV6-turbodiesel-enjin wat 160 kW krag en 600 Nm wringkrag ontwikkel.

Voeg daarby die Landie se uitmuntende agtgang-outokas en die feit dat daar wel 18 duim-wiele vir hom beskikbaar is vir ’n groter verskeidenheid veldrybande as wat sy standaard 19 duim-wiele toelaat, en jy’t ’n luuksemotor wat jy nou en dan veld toe kan vat – dis nou as jy dit oor jou hart kan kry.

Daarom kry dié Landie ons toekenning as Weelde-4x4 van die Jaar.