EKSPEDISIE-4X4 VAN DIE JAAR
Toyota Land Cruiser 76 Series-stasiewa V8-turbodiesel
Al vind daar tans heelwat ontwikkeling in Afrika plaas, is dit steeds die mees uitdagende vasteland vir 4x4’s. Hier soek jy ’n rateltaai ryding wat lang afstande kan aflê. Behalwe dat dit meganies feitlik onbreekbaar moet wees, moet dit ook prakties wees, want op ’n Afrika-tog moet jy byna al jou benodigdhede kan saamkarwei.
’n Mens soek ’n ryding met ’n leer-raamonderstel, vaste asse in plaas van onafhanklike vering, meganiese betroubaarheid en genoeg grondvryhoogte.
Min het in die afgelope paar jaar in dié mark verander, en voertuie wat aan hierdie vereistes voldoen, sluit in die Toyota Land Cruiser 76, die Land Rover Defender-stasiewa, die Nissan Patrolstasiewa en Mercedes-Benz G300 CDI Professional.
Die Defender is op sy laaste bene en hoewel die groot Patrol met feitlik enige hindernis kan klaarspeel, suip sy 4,8 liter-petrolenjin soos ’n vis.
Ook die G-Klas is ’n bekwame veldryer, maar teen ’n prys van byna ’n miljoen rand (R995 000) vir ’n uiters basies-toegeruste ryding (nie eens ’n radio of elektriese vensters nie) voel jy uitgebuit.
Soos die G-Klas het die Cruiser 76-stasiewa meganiese ewenaarslotte op die voor- en agteras, en ná ’n opknapping verlede jaar is sy binneruim netjies uitgerus met goed soos ’n ingeboude GPS om almal gelukkig te hou.
Sy groot V8-turbodieselenjin is egter die troefkaart. Hierdie 1VD-FTV-enjin van 4,5 liter ontwikkel 151 kW en ’n hele 430 Nm wringkrag laag in die toerestrek, wat dit onkeerbaar in die veld maak. Hy luier moeiteloos oor tegniese terrein en hy sukkel nie soos die gewone 4,2- diesel om ’n snelheid van 120 km/h op die lang pad te handhaaf nie.
En ja, ons weet Toyota dring aan dat hy op 50 d.p.m. diesel ry. Maar ons weet ook dat dit ’n oorkonserwatiewe benadering is en dat ’n paar tenks “gewone” diesel niks aan die enjin sal doen nie, want in Namibië ry die manne al jare lank met ingevoerde V8-turbodiesels op gewone diesel, sonder enige probleme.
Dit alles beteken die 76-stasiewa het nou die soort enjin wat reg laat geskied aan al sy ander bewese eienskappe. Dít, asook sy prys van R626 000, verseker dat hy die kroon as Ekspedisie-4x4 van die Jaar behou.