DÍS WAT JY KAN VERWAG
DAG 1:
Ons kry mekaar in Letlhakane, Botswana, en kies dan koers op ’n sandspoorpad tot op die plat vlaktes van die Makgadigadi-panne, waar ons die eerste nag op Kubu-eiland deurbring.
DAG 2:
’n Sonsopkoms oor die panne saam met jou koffie en beskuit is iets wat die doutrappers en ywerige fotograwe nie sommer sal vergeet nie. Ná ontbyt stap ons om die eiland met sy fassinerende rotsformasies en reuse-kremetartbome. Dan mik ons noordwaarts op ’n tweespoorpad al langs die panne. Ons bestemming – Maun.
DAG 3:
Ons bring die oggend in Maun deur, waar ons inkopies doen en brandstof volmaak. Jy kan ook vir ’n uur oor die Okavango-delta vlieg (dié vlug van R1 000 is opsioneel en nie in die toerpakket ingesluit nie). Dan val ons in die pad na ons volgende blyplek, op die oewer van een van die delta se hoofkanale.
DAG 4:
Ná ontbyt vaar ons op die Okavango-delta langs een van sy hoofkanale – in die gemak van aluminium-motorbote wat deur ervare plaaslike gidse bestuur word. Ons bekyk die voëllewe, geniet die kristalhelderwater en sien dalk ’n seekoei.
DAG 5:
Vandag mik ons na Namibië. Maar eers draai ons van die hoofpad af om die Tsodilokoppies met hulle meer as 3 000 Boesman-tekeninge te besoek. Ons luister na ’n interessante gesprek oor die Boesmans, besoek ’n museum en hou piekniek in hierdie wonderwêreld, die hoogste punt in Botswana. Dan is dit verder noordwaarts tot by ’n skaduryke oornagkamp op die oewer van die Okavangorivier in Namibië, ons basis vir die volgende drie aande.
DAG 6:
Vandag kan almal self besluit wat hulle met die oggend wil maak. Jy kan in die kamp ontspan of die nabygeleë Bwabwatawildreservaat besoek. Daar is ook ’n rits ander aktiwiteite, soos kanoritte, kulturele toere en hengel naby die kamp. In die laatmiddag gaan ons op ’n bootrit en kyk hoe die son oor die Okavango sak. Al die aktiwiteite, met uitsondering van die bootrit, is vir jou eie rekening.
DAG 7:
Ons besoek die Mahangowildreservaat. Mahango spog met vier van die Groot Vyf en is alombekend vir sy groot getalle bastergemsbokke en swartwitpense.
DAG 8:
Ons pak kamp op en kies koers via die Zambesi-strook (Caprivi) na ons volgende kamp, op die oewer van die magtige Chobe-rivier net buite Kasane in Botswana. Hier sal ons die laaste drie nagte van ons avontuur bly.
DAG 9:
Ons besoek die indrukwekkende Victoria-waterval. Dan kan jy in die dorpie Victoria Falls inkopies doen, of jy kan een van verskeie avontuuraktiwiteite aandurf, van rekspring tot helikoptervlugte (Dis nie by die toerprys ingesluit nie.)
DAG 10:
Ons doen ’n wildkykrit op ’n oop safarivoertuig deur die Chobe Nasionale Park, en ’n sonsondergangvaart op die Chobe-rivier. Dis ons laaste aand om die kampvuur waar ons vir oulaas die kameraderie en vriendskap kan geniet wat deur ons Afrika-bosavontuur gesmee is.
DAG 11:
Ons groet en vertrek na ons verskillende tuistes, maar net tot die volgende avontuur saam...