4 Sagte veldryroetes
Wie’t gesê jy’t ’n harde veldryer met laestrekratte nodig om die buitelug te geniet? WegRy se 4x4gradeerders vertel jou van vier roetes vir ’n sagte veldryer.
1 Koningskop, Sederberge, Wes-Kaap
Die Boesmansklip-roete in die Sederberge kan in ’n 4x2 sonder laestrek gery word, solank jou voertuig goeie grondvryhoogte het. Dit begin reg agter Koningskop se kampterrein en lei jou rustig teen die omringende berg uit vanwaar jy mooi uitsigte oor die Sederberge en die omgewing se eie Tafelberg kan kry. Langs die pad is talle stilhouplekke waar ’n mens die uitsig of rotstekeninge kan bewonder. Dele van die roete het rotsbanke en harde kontoere, maar genoeg vasstrapplek om dit nie té tegnies te maak nie. Die enigste taai stuk is net na die omdraaipunt, sowat 425 m bo seevlak. Hier is ongemaklike kliptrappe en asknopers en het jy ’n redelike grondvryhoogte nodig. As jy agterkom jou voertuig is te laag, is daar omdraaiplek. – Bruce Jenkinson Afstand: 6,3 km (1½ uur)
Naaste dorp: Citrusdal (27 km) GPS: S32.49843 E18.84871
Kontak: 022 921 3198; info@ koningskop.co.za
2 Koranna Getaway,
Oos-Vrystaat
Die Platoroete by Koranna Getaway is ontwikkel met die oog op 4x2-voertuie en sagte 4x4’s. Jy ry aanvanklik op plaaspaaie en volg dan die groot uitloper van die Korannaberg. Hierna volg dit die toegangspad voordat dit afdraai en in ’n vallei langs in ’n suidoostelike rigting mik. Dan begin die roete klim, al langs die berg se kontoere. Op pad kry jy ’n paar kort, maar skerp hellings en ’n paar geniepsige afdraandes. Dit is nie moeilik nie, maar jy moet nogtans sorg dat jy die regte lyn kies. – Peter Levey Afstand: 14 km (2-3 uur)
Naaste dorp: Clocolan (28km) GPS: S28.88186 E27.31802
Kontak: 082 302 9638 (Isa Eksteen); info@korannagetaway.com
3 Didibeng,
Oos-Vrystaat Die Didibeng-bergpark buite Fouriesburg het roetes vir sagte veldryers sowel as hardebaarde. Die sirkelroete van 40 km is meestal ’n maklike graad 2 en dis eers op die afdraaipaadjies na sommige uitkykpunte wat dinge taai raak. Die sirkelroete loop onder meer verby ’n ronde trog van sowat ’n meter diep wat uit die sandsteen gekap is. Links van die dipbak is ’n klein kloof waar ’n muur gebou is om ’n natuurlike swembad te vorm. Op warm somerdae kan jy hier afkoel. Verder op die roete sal jy ook ’n boskamp met ’n skouspelagtige uitsig oor die vallei teëkom. – Peter Levey Afstand: 40 km (4-6 uur)
Naaste dorp: Fouriesburg (2 km) GPS: S28.60420 E28.22438
Kontak: 058 223 0067 (Ann Wood); meiringlt@telkomsa.net;
4De
Wildt-4x4, Magaliesberg Die roete lê tussen Pretoria-Noord, Hartbeespoort en Brits. Die wildpark is 400 ha. groot en het ’n verskeidenheid van oppervlaktes, van rotse, tot modder en sand. Die roete is gegradeer van 2-4 en jou Terios is welkom. Sorg net dat jy die makliker opsie of die ontsnaproetes by taaier hindernisse kies. Dit word gewoonlik met ’n bordjie aangedui. De Wildt is ’n lekker plek vir ’n gesinsuitstappie met geriewe soos ’n swembad, piekniekplek, braaiplek, kroeg en ’n houtdek. Jy gaan ook heelwat wild sien. Afstand: 14 km (2-3 uur)
Naaste dorp: Pretoria (20 km) GPS: S25.66953 E27.94607
Kontak: 083 268 8185; 083 253 4651 info@dewildt4x4.co.za