Teëspoed in die bos?
Só maak jy as dinge skeefloop
As die stories begin loop oor ’n voertuigmodel wat die einde van sy leeftyd bereik, moet jy nie net luister vir nuus oor die nuwe model nie, maar ook vir spesiale aanbiedings op die ou model. Want sommige van dié pakkette is erg aanloklik, soos die Mitsubishi Pajero Sport Shogun.
Met die nuwe Pajero Sport wat volgende jaar beskikbaar is, het Mitsubishi koppe met die bekende Australiese vervaardiger Opposite Lock bymekaar gesit en ’n ekspedisieweergawe – die Shogun – bekendgestel.
Die Shogun is ’n gepimpte weergawe van die vlagskip Pajero Sport. En op dié veldryer kry jy die volgende by: Tough Dog-skokbrekers, stofpad-pensplate, rots- glystawe en treeplanke, Yokohama Geolander-veelterreinbande, ’n snorkel, verwyderbare sleepstang, rubberlaairuim-beskerming en ’n Frontrunner-dakrak.
Onder die enjinkap
Die Shogun het dieselfde 2,5 liter-turbodiesel-enjin en vyfspoed-outomatiese ratkas as die standaardmodel. Met 131 kW en 350 Nm wringkrag het jy dus genoeg krag vir veldry.
Mitsubishi Australië het baie tyd saam met Tough Dog spandeer om die regte skokbrekers vir die Shogun te kies – en die beste kombinasie was uiteindelik ’n skokbreker gemaak vir ’n 60:40-verhouding tussen veldry en teerpad. Die skokbrekers (waarvan die agterstes verstelbaar is) hanteer die ekstra gewig op die Shogun sonder moeite, maar bied steeds genoeg gerief dat jou stopsels nie op ’n grondpad uitskud nie.
Agter die stuur
Mitsubishi se unieke Super Select-vierwielstelsel laat jou kies tussen 4x2, deeltydse en heeltydse 4x4 en laestrek, met ’n agterste ewenaarslot.
Ons het ’n hele naweek van teer, grond en graad 5-hindernisse gehad om die Shogun se persoonlikheid te leer ken, en hy het homself bewys as ’n gemaklike langpadryer en ’n taai, vaardige veldvoertuig.
Ek hou ook van die spane agter die stuurwiel waarmee jy ratte kan wissel. Dit help vir vinniger versnelling as jy verbysteek, en gee jou ekstra beheer in die draaie.
Binnelangs
Behalwe vir die laairuim-beskerming kry die Shogun se binneruim ook Garmin se jongste NüviCam-GPS, met Tracks4Africa-veldryroetes gelaai. Die NüviCam is ’n navigasietoestel, ’n dashcam en ’n padmonitor. Dit neem op terwyl jy ry en waarsku jou wanneer jy te naby aan ’n ander voertuig ry.
In die veld kan jou hom gebruik om jou roete en hindernisse op te neem. Jy kan selfs ’n Garmin- app aflaai en jou foon met die NüviCam koppel om reisinligting te monitor.
Slotsom
Volgens Mitsubishi is al dié toerusting R70 000 werd, maar die prys van die voertuig (R514 900) bly onveranderd. Die vervaardiger meen die Shogun is gemaak vir sowat 60% veldry en 40% teerpad. Hierdie is dus nie die soort voertuig om te koop as hy net af en toe ’n grondpad gaan sien nie. Maar as jy waarde vir geld soek, en ’n goed toegeruste veldvoertuig, is die Shogun jou man.