MEDEWERKERS
’n Span met ’n 2016-plan
Jaco Kirsten
Ek is verleë om dit te erken, maar sedert my dienspligdae in 1988 was ek nog nie weer in die Kaokoland nie. Ek sal graag weer die pad tot op Swartbooisdrif wil ry (maar nie weer agterin ’n Buffel nie). Ons het daar skelm in die Kunene geswem, ten spyte van waarskuwings oor die krokodille. As jy 19 is, steur jy jou mos nie aan waarskuwings nie! Ek sal ook die ou basis by Ehomba wil besoek. Op Google Earth lyk dit na ’n nedersetting met ’n kraal en ek sal vra of ek daar kan kamp. Meer as 27 jaar later sal dit die voltooiing van ’n interessante sirkel wees.
Gerda Engelbrecht
Ek wil graag vanjaar die wildebeesmigrasie sien. Dis ’n ou droom van my om dit te ervaar. My kollega Evan het my nou wel vanjaar voorgespring, maar as die sterre saamspeel, sit ek dalk later vanjaar êrens in die Serengeti of Masai Mara en bekyk dié natuurwonder – deur ’n láng kameralens.
Charles Thompson
Voor 2016 op sy rug lê, wil ek ’n paar stofpaaie in Chili, Suid-Amerika ry. My vrou kom van daar af en ons skuld die familie ’n kuier. Daarna wil ek die grondpadroetes van Patagonië of diep in die Atacama-woestyn ry. Noord- en Suid-Chili is ewe wilde wêreld. Hoog in die noorde ry jy verlate grondpad deur een van die droogste plekke op aarde, waar die Dakar-manne jaag. Diep suid is jou tone in Antarktika, waar vulkane nog brom en jy ys van miljoene jare oue gletsers in jou whisky kan drink.
Gerrie van Eeden
Sedert ek Tim Butcher se boeke BloodRiver en ChasingtheDevil gelees het, het ek ’n groot begeerte om die donker hart van Wes-Afrika te besoek. ’n Plek soos die Demokratiese Republiek van die Kongo het nog altyd vir my ’n betowering ingehou as ’n bestemming wat nog nie ten volle verken is nie. Die feit dat daar gorillas in die Kongo is, is natuurlik ook ’n groot bonus. Of ek hierdie jaar in die Kongo sal uitkom, weet ek nie, maar ’n mens kan altyd hoop.
Aimee Bishop
Cape MacClear. Selfs die naam van hierdie tropiese bestemming in Malawi klink dromerig. Dis bekend as ’n gunsteling onder die reisigers wat die Malawimeer besoek. Dit gaan dalk ’n paar rowwe paaie en 4x4-ryvernuf kos om daar uit te kom, maar ek het nou maar een maal ’n swak plek vir ’n wit strand en kristalhelder water. Met ’n lekker jenewertjie in die hand, natuurlik. Boonop het iemand my een keer vertel jy moet ten minste een keer in jou lewe langs dié meer sit en ’n sappige mango eet. Nou kan ek dit nie uit my kop uit kry nie. Dis hoekom Cape MacClear op my emmerskoplys vir 2016 is.
Evan Naudé
Terwyl die res van ons op kantoor gesit het om dié brokkies te skryf, was Evan besig om een van sy droombestemmings – die Liuwavlaktes – van sy emmerskoplys af te merk. Lees sy storie op bl. 30. Hy sê Madagaskar is ook nog op sy lys. Skimp.Skimp.