Twee diesels vir gewilde Tucson-reeks
Die Kia Sportage se gewilde broer, die Hyundai Tucson, se reeks voertuie in Suid-Afrika is met twee nuwe modelle uitgebrei. Die Tucson en Sportage deel heelwat tegnologie en onderdele, onder meer enjins, platforms en aandrywingstelsels, maar die Tucson is al omtrent ’n jaar langer as die vierde generasie Sportage in Suid-Afrika beskikbaar.
In dié tyd het die Tucsons soos Fizzers by ’n kinderpartytjie van die verkoopsvloere verdwyn. Dis nou die topverkoper in sy segment en stof heelwat meer bekende kompetisie soos die Volkswagen Tiguan, Toyota RAV, Ford Kuga en BMW X1 uit. Die Tucson is ook een van die finaliste in die Wesbank Motor van die Jaar-toekennings.
Die dieselenjins wat ons verlede jaar in Spanje toetsbestuur het, was egter tot nog toe nie in SA beskikbaar nie. Dié twee dieselmodelle, ’n 1,7 liter- en 2,0 liter-, word aan die bopunt van die reeks geposisioneer. Hulle kry dieselfde spesifikasievlakke as hulle ekwivalente petrolmodelle en kos ook dieselfde – R439 900 vir die 1.7 Executive Diesel en R519 900 vir die 1.6 TGDi Elite (AWD).
Net die topmodel in die Tucson-reeks het heeltydse vierwielaandrywing. Die res is voorwielaangedrewe, wat beteken daar is nie ’n dieselmodel met vierwielaandrywing beskikbaar nie.
Die 1,7 liter-dieselmodel word egter met diensintervalle van 30 000 km/2 jaar bemark. Ons weet nie van ’n ander voertuig in Suid-Afrika wat so min gediens hoef te word nie.