Braai van Dallas tot in Marokko
ONDER REDAKSIE VAN CHARLES THOMPSON
Die brein agter Gunsteling Braairesepte is die resepontwikkelaar Lyn Woodward. Sy’s ’n gekwalifiseerde sjef, ’n Kaapse Wynmeester en ’n kosstilis. En sy kán braai. Sy’t idees soos pikante soetribbetjie, rooikerrie-beessosaties en ’n Texas-gekruide biefborsstuk.
Daar is ook lamtjops, ja, in ’n balsamiese asyn- en oreganum-marinade wat lyk of dit selfs ’n streng vegetariër se mond sal laat water.
Die skrywer mik telkens om bekende en tradisionele resepte ’n moderne aanslag te gee en sy eksperimenteer met nuwe smaakkombinasies. Só sal sy byvoorbeeld ’n paptert met groenrissies opkikker, geroosterde sampioene met ’n rooipeper-kruiebotter inkleur en knoffelbrood mer ’n kruie- en paprikamengsel opdollie.
Lyn is ’n bewese reisiger en die inspirasie in haar geregte strek van die VSA tot Marokko.
Dit klink omtrent soos restaurantkos, maar die geregte is ontwikkel om oor en om die braaivuur voor te berei, met bestanddele uit enige ordentlike supermark.
Jy sal dit selfs in die boendoes kan optower.
Daar is ook resepte vir slaai, bykosse, brood en gebak, vis, seekos en hoender. En natuurlik ’n soetding later die aand, wanneer die vlamme weer lekker hoog brand en die kampvuurstories (en grootpraat) mooi begin loop.