MEDEWERKERS
4x4-ouens kan ook “diep” wees
Andrew het sy Desember-vakansie op ’n alleenreis deur die Richtersveld en Namibië spandeer. Hy deel sy avontuur, en ’n bietjie selfrefleksie, in ’n reisstorie met ons. Wat is jou eerste toerherinnering? Die kere toe ek in Vic-valle se reënwoude gestap het en op die strand in Beira, Mosambiek, kon baljaar. Die lekkerste plek in die bos waar jy al was? Dit sal onregverdig van my wees om net een te kies, maar die Sperrgebiet wat ek op hierdie reis besoek het, is beslis ’n goeie kandidaat. Wat is die beste reiswenk wat jy nog gekry het? Hou genoeg spasie oop! Te veel goeters is nooit ’n goeie belegging nie. En dit geld eintlik vir afstande, tyd, toerusting, bestemmings en doendinge. Toer jy blindelings, of beplan jy jou reis? ’n Paar GPS-koördinate, ’n basiese doenlys en ’n vertrekdatum is gewoonlik genoeg vir my. Watter plek in Suid(er)-Afrika wil jy graag besoek? ’n Paar van die minder bekende dele van Angola. Is daar ’n reisskrywer se werk wat jy graag lees? Daar is ’n hele paar op aanlynforums. Dié wat ek die meeste geniet, is ook met motorfietse deurmekaar. Hulle gebruik aanlynname, soos Metaljockey, Colebath en Michnus, op PikiPiki.co.za. Watter musiek prop jy in as jy reis? Ek luister net af en toe na musiek. Ek vind dit trek my aandag af en vervreem my van die omgewing omdat dit selde gepas voel vir die plekke waar ek reis. Voor ek sterf … Ithuba se hoofkantoor om my Lottowenkaartjie op te pik sodat ek meer van Suider-Afrika kan sien!