SPOOKSPRUIT-4x4
As jy lus is vir ’n tegniese 4x4roete wat jou vernuf deeglik kan toets – en jou boonop ook ’n klomp nuwe, gevorderde vaardighede kan leer – moet jy sommer hierdie naweek ’n draai by Spookspruit4x4 gooi.
Dié 4x4-roete naby Balfour is sedert verlede jaar oop en het sy ontstaan te danke aan Johan Havenga, wat al jare lank by die Bridgestone Challenge betrokke is en ook al by hierdie 4x4kompetisie ’n beampte was.
Sakkie Coetzee, ’n bekende by die Challenge, het ook hand bygesit met die ontwerp van sommige hindernisse. En as jy al ooit die Bridgestone Challenge gery het, of ’n toeskouer was, sal jy weet oom Sakkie se hindernisse het al menige ervare 4x4-bestuurder op sy neus laat kyk of ’n paar swetswoorde laat brom. Om dié rede kan jy Spookspruit se roete ook net onder Johan se begeleiding ry.
Dis lekker om ’n ou soos Johan met sy vingers in die lug voor jou voertuig by elke hindernis te sien, want hy ken sy storie én sy baan. Johan verduidelik mooi watter uitdaging elke hindernis gaan stel (byvoorbeeld hoe jy hellings moet ry, lyne kies en afdraande oor klippe moet benader), en begelei jou versigtig deur elkeen van hulle. En hoewel die hindernisse dikwels nogal uitdagend is, weet hy ook watter om te vermy as dit nie geskik is vir jou voertuig nie.
Die hindernisse is in ’n sirkelroete uitgelê en jy kan enigiets, van modder, water en kliptrappe, tot los sand verwag. Spookspruit toets dus al jou (en jou ryding se) vermoëns in ’n beheerde omgewing. Daar is ook ontsnaproetes by die meeste van die hindernisse, dus is die roete geskik vir 4x4-bestuurders en -eienaars wat nog aan die onervare kant is.
Jy ry tussen plate proteabosse, sagte