6 VAN DIE BESTE
Ons wys jou ses moet-sien sonsondergange
Tankwa Tented Camp, Noord-Kaap
1As jy laatmiddag wes stap uit die Tankwa Tented Camp en ’n skip op die horison sien, is dit nie omdat daar vroeër iets onwettigs in jou dop beland het by die kamp se Onverklaar Bar nie.
Hierdie is nou ’n sonsondergangfoto wat jou pêlle by die huis gaan geniet en een wat jy nooit sal vergeet nie. Die Tankwa-Karoo is een van Suid-Afrika se dorste streke, maar soos die son oor die klipperige aarde sak en die donkerte daal, lyk daai skip kompleet soos een wat ver op die oop see dobber.
Die storie agter dié skip loop so: Die Tankwa Tented Camp lê in die Stonehengenatuurreservaat, dieselfde eiendom waar die jaarlikse Afrikaburn-fees gehou word. ’n Hoop vreemde voertuie, vlotte, standbeelde en strukture maak jaarliks hulle opwagting by hierdie buitelug musiek-en-kunsfees. Van Stonehenge se eienaars is ook by die fees betrokke en so is die skip se ankers toe een jaar ná Afrikaburn hier by die tentkamp gegooi.
Terloops, die terrein waar die fees gehou word, is net ’n kilometer of wat van die Tented Camp af. Die meeste van die strukture wat gebou word, word as deel van die fees verbrand, maar daar bly dikwels ’n paar oor. As jy dus nóg interessante foto’s wil neem, ry rondom sonsondergang na die terrein toe en gaan kyk watter snaakse strukture nog daar staan.
Kontak: Maryke 082 899 1333; bookings@tankwa.net
Sesriem-kampeerterrein, Namibië
2Die Sesriem-kampeerterrein is bekend om ’n paar redes. Ja, verblyf in die kampeerplek is nie meer goedkoop nie. En as jou tydsberekening reg (of verkeerd) is, kan daar dalk net ’n Overlanding-vragmotor met ’n spul Europese meisies stilhou om ook daar oor te staan.
Volgens die meeste toeristegidse en artikels is die kampeerplek net ’n halfwegstop op pad na die Sesriem Canyon, net ’n bietjie meer as 3 km suid, of Sossusvlei, ongeveer 61 km suidoos per 4x4. En ja, hoewel die vlei en omliggende gebied baie mooi is, is daar een ding waaroor min mense praat, en dis die ongelooflike (jis, maar daai cliché is gepas in dié geval!) sonsondergang in die kampeerterrein. Want vir omtrent 20 minute is die sandgrond en Naukluftberge in die ooste in ’n oranjegeel gloed gehul, net voordat die son anderkant die westelike horison inglip vir sy nagrus.
As jy die beste van die son wil sien, sorg dat jy aan die kamp se noordelike grens gaan staan. Dis meer oop daar en gee jou ’n beter uitsig oor die vlakte langs die kamp, sowel as die Naukluftberge na die ooste. Kontak: nwr@nwrnamibia.com of 013 751 2220 (Namibia Wildlife Resorts se SA nommer)
Kamchab-kampeerplek, Namakwa-4x4-ekoroete
3Een van die Namakwa-4x4-ekoroete se vele hoogtepunte is ’n aand of twee op die Kamchab-kampplek op die oewer van die Oranjerivier. Om daar uit te kom, moet jy by S28.97204, E17.99513 afdraai en vir omtrent ’n uur lank die 20 km-lange droë loop van die Kamchab-rivier ry. Daar aangekom, kan jy basies op enige plek naby die river kampeer, want dis wild kamp op sy beste. Die kampplek is egter min of meer by S28.85302, E18.02908. Hou in gedagte dat vloede die rivieroewer jaarliks verander, so gebruik jou goeie oordeel.
Nadat jy tent opgeslaan het, jou stoel staangemaak het en jou eerste koue bier geniet het, moet jy na jou horlosie kyk en die son begin dophou. Want wanneer hy aan die westekant, skuins agter jou linkerskouer, begin sak, gaan die klipkranse aan die Namibiese kant van die rivier skielik die son se strale begin wys in ’n kaleidoskoop van geel, oranje en ligrooi. Sorg dat jy reg is daarvoor, want die beste kleure kan skaars 20 minute lank gesien word. En as die skadu’s begin klim en die laaste kleure teen die kranse uitdruk, kan jy maar solank begin vuur maak. Want hier gaan dit nog lekker raak. Kontak: Namakwa Toerisme, 027 712 8035/6
Namakwa Nasionale Park, Noord-Kaap
4Die Weskus het dikwels ’n klop mooi sonsondergange op ’n streep, veral in die herfs- en wintermaande wanneer daar wye stratuswolke in die lug hang. Of jy nou op die kaai in Saldanha staan of in Alexanderbaai hengel, jy is byna gewaarborg om ’n skouspelagtige sonsondergang te sien.
Die kampeerplekke van die Namakwa Nasionale Park se kusgedeelte, tussen die Groen- en Spoegriviermonde, is die beste plek om totaal en al van die mensdom af weg te kom. En dis een van die min plekke in die land waar jy só naby aan die see mag kampeer en kilometers se sandpaaie met jou 4x4 mag ry.
Nodeloos om te sê, jy gaan die son oor die see sien sak, iets wat nie oral in Suid-Afrika gebeur nie. Dis ’n uitstekende plek vir silhoeëtfoto’s teen die sakkende son en as jy laag genoeg mik, kan jy die kleure van die lug wat op die nat sand naby die water weerkaats ook vasvang.
As jy nie wil bodder met ’n kamera nie, kan jy bloot in jou kampstoel agteroor sit (hopelik met ’n vissie op die braai) met die wete dat jy die allerlaaste persoon in die hele land is wat sien hoe die son oor die horison verdwyn. Kontak: 027 672 1948 of elanza.vanlente@sanparks.org
Kubu-eiland, Botswana
5Kubu-eiland op die Makgadikgadi-panne in die noordooste van Botswana is een van daardie plekke wat jy eenvoudig moet besoek as jy jouself as ’n ernstige verkenner van Afrika beskou. Dié panne is meer as 12 000 km2 wyd en is die grootste deel van die jaar ’n droë vlakte. Maar wanneer dit in die wintermaande reën, is dit toe onder die water en jou kans om vas te val of te verdwaal is groot.
As jy dus die reënseisoen in ag neem, is dit duidelik waarom Kubu ’n eiland genoem word. Dié klipperige koppie met sy versameling kolossale kremetartbome staan stoksielalleen in die wye panne en wanneer jy hier kampeer, is die gevoel van isolasie tasbaar. Hier is jy op jou eie en jy moet álles bring wat jy nodig het om te oorleef, maar dis juis wat hierdie plek so spesiaal maak.
Die beste manier om die sonsondergang te beleef is om jou kampstoel te vat en ’n ent op die pan uit te stap (moet nie op die pan ry nie) met ’n skemerkelkie. Sit met Kubu agter jou sodat die skynbaar oneindigende panne voor uitgestrek lê. Kontak: (+267) 297 9612, (+267) 7549 4669 of kubu.island@ btcmail.co.bw
Choberivier, Botswana
6Botswana se Chobe Nasionale Park is bekend as Afrika se superpark vanweë sy hoë konsentrasie wild, en die reservaat se troefkaart is die rivier waarna dit vernoem is. Die park bied wildkyk-bootvaarte op die rivier aan teen sonsondergang en dit is ongetwyfeld een van die beste maniere om wild te kyk. Jy kan binne etlike meters van krokodille, seekoeie en selfs olifante op die wal kom. Soos die temperatuur daal, kom die diere rivier toe om water te drink en as jy gelukkig is, kry jy dalk ’n paar olifante wat deur die rivier na een van die eilande daarin swem. Jy het dus nie ’n teleskopiese lens nodig vir goeie dierfoto’s nie, inteendeel, jy sal waarskynlik die ooghare op ’n seekoei met jou selfoon kan afneem.
Benewens die diereprag bied die son ook elke aand ’n skouspelagtige vaarwel. Hoe laer dit sak, hoe dieper rooi word dit, tot dit uiteindelik die hele lug rondom jou in skakerings van pienk en oranje verander. Jy het ’n keuse tussen ’n groot boot wat tot 40 mense kan vervoer en met kroeë toegerus is, of kleiner private bote wat jou ’n bietjie duurder sal kos. Daar is ook operateurs wat spesifiek op fotografie fokus. Meer inligting: www.chobenationalpark.co.za/tour/chobe-boat-cruises