EK WIL OOK GAAN!
Naaste dorp: Heidelberg, Gauteng. GPS: S26.579330 E28.353287
Hoe lyk die roetes? Die bergroete is ’n klipperige tweespoor wat jou tot op ’n koppie en weer terug na die plaas vat. Dit duur sowat 2 uur om die roete te voltooi.
Die ou gruisgat is ’n kombinasie van veldpaadjies en modderhindernisse ná goeie reën. Jy kan egter besluit watter van die hindernisse jy wil takel en as jy nie wil deurry nie, kies jy bloot ’n ander paadjie.
Die hindernisbaan is ook ’n kombinasie van hindernisse. Hier sal jy steil bulte, dongas, modder en asknopers teëkom.
Het ek ’n 4x4 nodig? Jy sal die veldpaadjies om die gruisgat in ’n 4x2 met ’n ewenaarslot kan ry, maar vir die bergroete en hindernisbaan het jy ’n 4x4 met ’n agterste ewenaarslot en die regte bande nodig. (Highway Terrains gaan dus nie werk nie.) Die hindernisbaan is vir ervare bestuurders ontwerp en die eienaars beveel ook aan dat jy dit nie alleen probeer ry nie, dus is ’n minimum van twee voertuie (met herwinningstoerusting) nodig.
Waar kan ek bly? Heidelberg-4x4 het verskeie boskampplekke waar jy heerlik afgesonder is van die mensdom.
Wat kan ons nog doen? Daar is ’n piekniekarea met braaigeriewe en baie koelte, ’n klimraam, klein swembad, afdakke wat oor ’n gruisgat uitkyk en ablusiegeriewe vir dagbesoekers. Jy kan ook hier motorfiets en bergfiets ry, of sommer net stap.
Koste: R200 per voertuig en R30 per insittende as jy die roetes ry, R40 per persoon as jy net kom piekniek hou of stap. Kampering kos R100 per persoon.