6 MOET-DOEN- DINGE!
1 EET ’N HAENERTSBURGER
Daar is ’n hele paar lekker restaurante in Haenertsburg, maar by die Iron Crown Pub is daar ’n maaltyd op die spyskaart wat uit bestanddele uit die streek gemaak word. Stel jouself voor: tuisgemaakte mayonnaise, organiese blaarslaai en kaas van Wegraakbosch, heuning-geroosterde makadamianeute van Tupelo, bessieblatjang van Magriet’s in die dorp en plaaslike avokado op jou keuse van een van ses verskillende tuisgemaakte patties. Voeg ’n Zwakala-bier by en jy het ’n volledige local is lekker-maaltyd!
2 PROBEER VLIEGHENGEL
Een van die gewildste doendinge in Magoebaskloof is vlieghengel. Daar is verskeie damme en riviere waar jy kan lyn gooi vir forel en baie van die verblyfplekke het hulle eie viswaters. Dit is meestal ’n vang-en-vrylaat ( catch and release)- stelsel sodat daar ’n gesonde visbevolking kan voortbestaan. Permitte en stokke is by die Haenertsburg Trout Association beskikbaar. Meer inligting: www.magoebasklooftourism. co.za/fishing.php
3 VERKEN DIE WOUD TE VOET
Magoebaskloof het van die mees ongerepte inheemse woude asook die hoogste denne- en bloekomplantasies in die land. Dis een ding om daar deur ry, maar die regte skoonheid van die bome kan net ordentlik te voet op die versameling staproetes in die gebied gewaardeer word. Roetes wissel van kort daguitstappies tot die 50 km, drie dag lange Magoebaskloof-staproete. Meer inligting: www.magoebasklooftourism.co.za/ hiking.php
4 SIT MODDER OP JOU 4X4
Daar is baie grondpaaie deur die woude en plantasies (soos Woodbrush Forest Drive, die Old Coach-pad en die pad na Serala-staatsbos) wat lekker daguitstappies maak. Baie van die paaie is net in ’n 4x4 begaanbaar, veral as dit reën. As jy egter ’n groter uitdaging soek, kan jy die hindernisbaan by The Hub in George’s Valley probeer of ’n begeleide 4x4-uitstappie deur een van hulle konsessies bespreek. Kontak georgesvalley4x4@gmail.com
5 LAAT DIE ADRENALIEN VLOEI
As jy in ’n avontuurlustige bui is, maak ’n draai by Magoebaskloof Adventures in George’s Valley om die Groot Letaba-ravyn op ’n unieke manier te verken. Hier kan jy met glykabel ( zipline) oor die rivier rits, deur stroomversnellings in ’n opblaasband tuimel of teen die kranse af abseil. Meer inligting: www.magoebaskloofadventure.co.za.
6 SIEN ’N SKAARS VOËL
Die inheemse woude rondom Magoebaskloof en die Haenertsburg-grasvelde is van die land se beste voëlkykgebiede. Die skaars Swartoogboslaksman kom in ’n paar spesifieke stukkies woud hier voor. By Kurisa Moya Nature Lodge is daar twee van die land se beste gidse, David Letsoalo en Paul Nkhumane, wat jou verseker sal help om ’n paar spesies op jou lys af te merk. Meer inligting: www.magoebasklooftourism. co.za/birding.php