TuffCats spin harder
Die boswoonwa-vervaardiger TuffCats, met drie modelle op die mark, het pas sy 20ste wa verkoop. Die eienaar, Gerrie Nel, ( Nee, nie dáái Gerrie Nel nie. – Red.) het in 2012 ’n boswa gekoop, maar hy was nie tevrede met die gewig van die wa nie. Hy het besluit om sy eie een te bou, maar kort daarna het ’n vriend dit by hom gekoop. Gerrie moes toe vir hom ’n nuwe wa bou.
Dié een het hy ’n kort rukkie later óók van die hand gesit, en ná die vierde wa waarmee Gerrie dieselfde paadjie geloop het, het hy ’n sakegeleentheid raakgesien. Siedaar: TuffCats.
Vandag kan kopers kies tussen ’n standaard-boswoonwa, ’n kleiner weergawe hiervan en ’n boswa – almal ’n aluminiumromp en -raamwerk wat op ’n gegalvaniseerde onderstel pas.
Die drie modelle heet die Mdaba (die boswa), Shumba Cub (die kleiner boswoonwa) en Shumba (die standaardboswoonwa). Die name is almal Shonawoorde en beteken onderskeidelik luiperd en leeu.
Die Shumba se Cub-model is ongeveer ’n halwe meter korter as die standaardwa. Die buitekombuis is byna dieselfde, en waar die Cub se deur aan die agterkant sit, is die standaardmodel s’n in die linkerpaneel. Albei is beskikbaar met een of twee dubbelbeddens – dié slaan in die standaardwa uit die regterpaneel plat. Die tweede bed slaan oor die A-raam oop.
In die standaardvorm is die waens toegerus met items soos die watertenk (met ’n pomp), gasgeiser, een diepsiklusbattery, ’n stoepdak oor die kombuisgedeelte, ’n tweeplaatgasstoof en kombuisgoed soos bekers, glase en borde (6 van alles). Dis net die ys-vrieskas wat uitgesluit is.
Een van die Shumba se meer unieke eienskappe is die buitestort wat regs agter langs die bed uitvou. ’n Vierkantige deur met skarniere teen die dak swaai boontoe oop en ’n gasstut hou dit oop. ’n Seilhokkie vou onder die deur oop tot op die grond. Makliker kan dit beswaarlik. Die syfers Mdaba R148 200 (tarra ± 780 kg, BVM 1 600 kg); Shumba Cub R222 300 (tarra 880 kg, BVM 1 600 kg); Shumba R239 400 (tarra 920 kg, BVM 1 600 kg). Kontak 082 301 2393; gerrie@tuffcats.co.za; tuffcats.co.za