Dit woel daar by Dinokeng
Die eienaars van die Dinokeng-oord, een van die nuutste kampplekke by die Dinokengreservaat, laat nie gras onder hulle voete groei nie: Hulle het nou ook ’n warmwaterswembad gebou.
Die gebou waarin die swembad gehuisves word, het ’n kleurryke geskiedenis.
Die vorige eienaar het ’n ou plaasdam toegebou en dit in ’n kerkie omskep waarin mense onder meer kon trou.
Maar hulle het nie alles afgebreek nie en die dak van die kerkie het behoue gebly. Die swembad se water sal deur die jaar tot 35-36 ºC verhit word, sê die eienaar Coleen Pieterse.
Boonop het Coleen-hulle nog 13 staanplekke by die bestaande 33 gevoeg. Vier hiervan is staanplekke wat elk ’n eie badkamertjie het.
Die nege gewone staanplekke het elkeen gras, krag, water, koelte en ’n braaiplek. Agter die bestaande badkamers is nog ’n ablusieblok gebou.
Die tweede waterwurm word in November geïnstalleer, en intussen het hulle ook ’n restaurant geopen.
Kontak 063 771 6856 of 060 970 5990; info@dino kengresort.co.za; dinokeng resort.co.za