PEUGEOT MAAK DIE PAP DIK AAN...

Peugeot se nuwe 3008 is ’n mooi ryding, maar as ’n sportnuts is hy ongelukkig effens onprakties: Hy het ’n maksimumsleepgewig van slegs 600 kg, wat beteken die swaarste wat jy mag sleep, is byvoorbeeld ’n Venter Glide, dié vervaardiger se die kleinste waentjie. Boonop is daar geen viertrekopsie nie. ’n Mens wonder hoe Peugeot dit as ’n sportnutsvoertuig kan bemark.

Hy lýk soos een en die vastrapbeheer is genoeg om met ’n gemiddelde plaaspad af te reken. Maar diep sand, modder en klippe? Aikôna.

Die harde vering en 18”-wiele is ook glad nie gelukkig op sinkplaatpad of slaggate nie.

Pryse wissel van R399 900 vir die intreevlak-Active 1.6 THP (outomaties) tot R569 900 vir die vlagskip GT Line+ 1.6 THP (outo).

In ander nuus uit dieselfde stal sê Peugeot Suid-Afrika daar is beslis ’n dubbelkajuitbakkie op pad. Maar anders as wat in sommige publikasies beweer word, gaan hy nié op die Nissan Navara of die Chinese (en skreeulelike) Dongfeng Rich geskoei wees nie.

Peugeot swyg oor die oorsprong van die onderstel, maar aangesien die Franse vervaardiger ’n deelooreenkoms met Toyota geteken het, is daar ’n kans dat hy onderdele by die Hilux gaan leen. Ons sal finaal weet as die bakkie in 2020 bekend gestel word.