Stomend warm

Warmbronswembaddens is vir kampeerders soos lekkergoed vir kinders: ’n mens kan net nooit genoeg daarvan kry nie. Ons klim in die warm baddens van drie oorde in die Wes-Kaap en kamp dat die stoom so staan.

Om ’n oord te besit met ’n minerale warmbron is soos om met die spreekwoordelike goue lepel in die mond gebore te word. Met die luukse van ’n onuitputbare bron van warm water is die stryd vir oordeienaars al halfpad gewonne.

Dit is allermins te sê warmbronoorde is almal dieselfde; die drie Wes-Kaapse kampplekke waar ons gaan draai het, het elkeen sy eie karakter en hier is iets vir elke soort kampeerder.

By The Baths naby Citrusdal kamp ’n mens onder groot koeltebome waar jy deel van die natuur voel, en al is die kampplek stampvol, het ’n mens steeds genoeg privaatheid. Die ATKV se Goudini-spa is die teenoorgestelde en gerat vir groot getalle besoekers. Dis skaars 5 km van Rawsonville af, en nét die kampplek as ’n ellelange waterwurm ook deel van jou gesin se kampvereistes is. En die Warmwaterbergspa naby Barrydale skep die gevoel van ’n plaaskamp waar jy langs ’n stofpad uitspan en jou vir ’n dag of drie in borrelende warm water lawe. >